Phnom Phen

19Nov2017

Am Fritig nochem Zmorga simer nomol a Rundi go bada und denn homer chönna mitem Boot uf di ander Siita voda Insla fahra. So homer üs da halbstündig Fuassmarsch ersparrt, dafür a 1.5h Bootsfahrt uf üs gno. Am Saracen Beach simer no s letscht mol is Wasser gumpet, hond Zmittag gessa und denn isch o scho s gross Boot cho wo us zruck uf Sihanoukville brocht hät. Ufem Rückwäg sind nu da Käpten, da Schiffsjunge, da Instructor Marco, d Kerly und mür 3 (Tanja, Andy & i) gsä. Nochdem mer vo Board sind, hät üs da Marco a Tuktuk organisiert und damit simer zum Dive Shop. Zum Glück häts gad no a vorigs Zimmer (sogär mit AC und Warmwasserduschi) ka womer hond chönna bezücha. Nochem Znacht simer bald is Bett well am nögsta Tag am 7i da Wecker gschället hät. Denn simer kurz go essa, hond üs voda Kerly verabschiedet und sind mitma Büssli uf Phnom Penh gfahra. Döt homer a Hostel bezoga und sind no chli dur d Stadt gschlenderet. Da Samstig isch underem Motto "Kambodschas Vergangenheit" gstanda.
Mür hond d Killing Fields und s Tuol Sleng Gfängnis (S-21) bsuacht. Für dia wo ko Ahnig voda Kambodschanischa Gschicht hond (so wia mür bis hüt) do a kurzi Zemmafassig. Nu für Lüüt wo krassi Sacha lesa chond. Sus besser überspringa.
Vor 1975 hät da Pol Pot, en Kambodschaner wo z Paris studiert hät, d Idee vomna Kommunistischa Kambodscha ka. Er hät gfunda dass d Städter und di bildeta Lüüt besser gstellt sind as d Buura und hät wella, dass alli Lüüt ida Landwirtschaft tätig sind und alles allna ghört unds ko Geld meh git. Denn häter sich mit Jugendlicha vom Land zemma to und di rota Khmer gründet. Innerhalb vo nu 3 Täg hond Phnom Penh "evakuiert" und alli Lüüt ufs Land vertriiba. Well di bildeta Lüüt nöd i de kommunistisch Gedanka passt hond (obwohl da Pol Pot selber ona vo dena gsä isch, gnau so wia da Hitler selber nöd arisch gsä isch), sind alli wo a Fremdsproch hond chönna, a Brilla treit hond, en Bruaf wia Lehrer oder Ingenieur usgüabt hond, oder aber o scho nu ida Stadt gläbt hond, Feinda gsä. Di ganz Bevölkerig hät mösa Zwangsarbeit ufem Feld leista. Di bildeta Lüüt sind systematisch ermordet wora. Zersch sind vieli is S-21 (a ehemoligi Schual) cho. Döt sinds so lang gfolteret wora, bis gstanda hond, ebbis gega Regime gmacht z haa. Z.B. für d Amis spioniert z ha. Sobalds so ebbis gstanda hond, sinds zuda Killing Fields brocht wora. Döt sinds mit Äxt erschlaga und i Massagräber verbuddlet wora. Damit di Verwandta/Chind ko Rache hond chöna usüaba, sind so ganzi Familena ermordet wora. Da Lüüt isch bida Akunft uf da Killing Fields ageh wora sü chemid i neui Hüüser. Damits nöd checkt hond, wa döt vor sich goht, sinds i Hüttana ohni Fenster gsperrt wora und s ganz Gländ isch mit Musig beschallt wora, damits d Schrei voda Sterbenda nöd ghört hond.
I da Ziit vom Pol Pot sind 3 Mio. vo da 8 Mio. Iiwohner Kambodschas umbrocht wora.
Irgendwenn hond di rota Khmer agfanga sich gegasiitig z ermorda, well niamer niamertem meh traut hät, und jeda en potenziella Feind gsä isch. Eppa 1979 sind denn d Viatnamesa mit Desserteura voda rota Khmer iimarschiert und hond di rota Khmer vertriba. Erst do isch langsam uscho, wa uf dena Killing Fields und allgemein im Land passiert isch.

D Mehrheit voda Massagräber uf da Killing Fields sind göffnet wora und d Chnocha sortiert und gsüberet wora. S grösst Grab hät eppa 450 Liichana dinna ka. Bi vielna Gräber häts hüt Mahnmal. Mer findet hüt no Chnöcha und Kleider vo Opfer wo bim Rega füra chomid wens d Erda wägwäscht. Isch mega iidrücklich. A om Ort häts ida Wurzla voda Bömm no echt viel Kleidigsstuck ka wo damit verwachsa sind und wemmer gnau gluagat hät, hätmer o no Chnöcha entdeckt. Isch mega erschreckend und o ziemli verstörend. All 2-3 Mönet dond d Wächter voda Killing Fields so Kleider und Chnöcha iisammla. Mer hond fast 2h döt verbrocht und s isch echt extrem krass. Danoch simer no is Gfängnis S-21 und hond o no en Rundgang mitma Audioguide gmacht. Döt stond no d Better wo d Häftling gfolteret wora sind und o sus isch vieles im Originalzuastand und s isch recht verstörend. Vorem Usgang isch no en Maa ghogget wo da Gfängnis überlebt hät. Es sind glob nu 7 Lüüt lebendig usacho. Mer hond kum gmerkt wia schnell d Ziit verganga isch. Sind erst kurz vorem 3 mit dena 2 Rundgäng fertig gsä und ebbertem ohni starchi Närva, würi de Bsuach vo dena Ort definitiv nöd empfehla. Wani no krass gfunda ha, a om Ort im Gfängnis häts a Tafla ka, womer hät chönna züüg heraschriba. Ebbert hät gschriba: "Never again" und en andra denn an Pfiil zu "Myanmar?" Di meista hond wohrschindlich nochem 2. Weltkrieg scho denkt "never again" und glich isches sit do leider no zu meh sotiga Verbrecha cho...

Uf da Fahrt zrugg uf Sihanoukville Wo da Mekong und da Tonle Sap zemmaflüssis Dessert Sunnaundergang am Mekong / Tonle Sap

Koh Rong Samloem aka Paradise

16Nov2017

A paar hond sich viellicht gfröget, wieso dass nünt meh vo üs ghörid. Well mer uf Koh Rong Samloem gsä sind und ko Empfang ka hond. Het zwor glob Wifi ka aber hond denkt, verzichtid mol a paar Täg ufs Online sii. So chammer richtig abschalta... Etz aber dazua wiamer do ana cho sind.

Am Samstig homer bis am 9i pfuuset, d Wösch abgeh zum Wäscha und denn homer s Hostel verlängeret und drumm no mösa s Zimmer wächsla. Danoch simmer für da Zmorga go a Resti suacha. Nochm Zmorga homer üs ufgmacht zum Dive-Shop. Mer hond planet ka zum üsa Tauchkurs am Mentig afanga. Denn homer denkt es wär gmüatlich zum scho en Tag früaner uf d Insla zum ofach no chli entspanna und am Strand ligga. Da Dennis (en Dütscha) wo d Tauchschual leitet hät gset dass da ko Problem isch, fallsmer wend chomer sogär da Kurs scho am Sunntig afanga, well denn eh no a anderi Schüalerin isch und denn üs zemma neh chönntid. Spontan wiamer sind homer zuagset. Denn hätter üs gfroget ebmer vilicht gad do (am Samstig) scho wend mitem Theoriekurs afanga. Wells eh di ganz Zit grägnet hät und mür nu planet ka hond zum an Strand, homer denn gad agfanga. Er hät üs ofach dia Videos im Iigangsbereich vom Shop laufa loh, also alles mega improvisiert, aber so homer d Film sogär uf Dütsch chönna loga und hond an Vorsprung ka, so dasmer am Sunntig 1.5h weniger Theorie ka hond. Denn so am 4i simer wieder usem Shop ganga, go Zmittag essa und denn is Hostel go d Wösch abhola und denn scho bald wieder go Znacht essa. Döt simmer denn ewigs hogga bliiba, so dasmer danoch num gross was gmacht hond user is Hostel zrugg und go pfuusa. Am nögsta Morga hät üs da Pacman am 6.30 Uhr abghohlt und üs zum Dive-Shop gfahra. Da Pacman isch da Tuktukfahrer wo üs am Fritig noch da Akunft z Sihanoukville ofach nöd für weniger Gäld hät wella is Hostel fahra. Er isch mega frustriert gsä wellmer hond wella handla und er doch ofach Geld brucht, well "the f*cking chines people destroy the business". Dazua isch vilicht no z schriba dass dia Stadt fortzua vo Chinesa ufkooft wird unds 1 Hochhuus nochem andra anapflanzid. Hät mega viel Casinos ida Stadt und dia lockid anschinend viel Chinesa ah. S isch so extrem das Einiges i Khmer, Englisch und Chinesisch agschriba isch. Uf jedafall hät üs de Pacman denn am Samstig nochem Diveshop scho abgfanga und homgfahra (dasmol für 5$ statt wia letstmol für 6). Und denn häter üs d Nr. geh und mür hondem denn gschriba daser üs am Sunntig morga chönnt abhola. Aber leider wieder für 6$ well "6.30AM is so early girls". Aber immerhin ischer pünktlich am 6.30 detgstanda und hät üs id Stadt gfahra. Döt homer no uf a paar Lüüt mösa warta, hond da Marco üsa Dive-Instructor kenna glernt und denn homer boarded. Noch 2h simmer uf Koh Rong Samloem acho. Isch echt traumhaft do, wisa Sand und türkisblaus Meer. Nochana homer da ganz Tag Theorie dura gnoh und nomol paar Film gloget. Wels aber mega unorganisiert sind, honds dia Film denn do nu uf Englisch ka. Rächt schwach dafür, dass mit "di einzig tütschsprochig Tauchschual z Kambodscha" werbid. Irgendwia isches denn aber all ganga. Mür hond a Englischs und a Tütsches Theoriebuach und so homer nard meh oder weniger alles verstanda. Am 5i am Obet simer denm fertig gsä und hond da halbstündig Fuassmarsch uf di ander Siita voda Insla an Sunsetbeach under d Füass gnoh. Döt homer no schnell an Schwumm to, di mega abacho Underkunft (wo bim Pris für d Tauchschual dabi isch) bezoga, duschet und denn simmer is Huba Huba. Döt homer üs mit da Nicole troffa, a Tütschi wo da glich Kurs macht wia mür aber an Tag vorus isch. Nochem Znacht simmer no chli zemma ghogget bevor mer is Bett sind.
Am 2ta Tag uf da Insla simmer nochma Zmorga im Robinson (Päärli-Hotel) wieder di halb Stund dur da Dschungel uf di ander Siita voda Insla gloffa. Dött homer denn mitem In-Water-Training agfanga. Döt isch no a Malaysierin dazua cho. Zersch hommer mol mösa 200m im Meer schwimma und üs 10 Minuta triiba loh. D Malaysierin hät denn scho mega Müah ka wells bitz Wälla ka hät und glichzittig mega gschiffet hät. Für üs isches nard ko Problem gsä usser dasmer mit da Auga zua hät mösa Schwimma wells so grägnet hät. Nochana hätt da Marco da Instructor ihra nomol a Chance geh. Denn hätsi s Ganze mit Tauchbrilla und Flossa chönna macha. Danoch homer denn s ganz Equipment kenna glernt, da Tank, d BCD, Regulator, Inflator, Gwicht,... Denn häts ghaasa di ganz Waar alegga und ab is Meer. Döt homer denn mol d BCD, da isch so dia Westa wo alles agmacht isch, ufblosa und üs triiba loh. Bida Kerly (d Malaysierin) hät irgendebbis nöd rächt too, drumm homer mösa warta, bis ihra sini Westa ustuscht ka hond. Denn sinds zrugg cho is Wasser, wellsich d Kerly aber nöd wohl gfühlt hät (mür sind üs nöd sicher ebsi würklich gnuag guat schwimma ka) ischsi denn wieder usem Wasser. Denn homer endlich recht chönna afanga. Zersch homer glernt wiamer richtig abtaucht, und dunna homer denn so verschiedeni Skills glernt. Da Regulator (da Ding womer im Muul hät zum Schnuufa) usaneh, und wäg to so dassmers hät müsa wieder mit da Hand finda, is Muul neh und usblosa, nochana homer d Maska halba mit Wasser gfühlt und dia mösa usblosa, denn homer glernt wiamer am Tauchbuddy seit, dasmer ko Luft meh hät und sin Ersatzregulator ninnt, denn mitenand a onra Fläscha hanga und uftaucha, d Maska ganz fülla und nochana usblosa, denn no d Maska abneh und 15m schwimma und si wieder alegga. Und o mol hät da Mark denn d Fläscha zuatrait und wo da Manometer Null Bar azeigt hät, mer aso ko Luft meh übercho hät, hätmer da mösa mitem Handzeicha zaga und denn häter d Fläscha wieder uftrait. Dia womi guat kennid, wissid wia wasserschüch dasi bi, bzw. dasi kum cha ohni Nasazuaheba taucha. Denn häni o recht Angst ka vo dem Maskafülla. Irgendwia isches denn aber glich ganga. Bim 15m Taucha (blind well sus d Linsa usakeiid, aber da Instructor hät üs gfüahrt) hani Wasser id Nasa übercho und bi denn chli i Panik cho und wianen Pfiil ad Oberflächi. Well mer nu an Meter under Wasser gsä sind, isch aber nöd so Schlimm gsä. Denn homers nomol probiert, und denn isch ganga. Zum Abschluss homer no en Minidive gmacht. Sind ofach chli hinderanand hertaucht. Aber d Sicht isch dermassa schlecht gsä, dass mer da Marco mol numma gfunda hond. Mengmol hätmer anand nöd mol meh gsä wemmer a Armlängi nebetanand gsä sind. Noch mina 2 Tauchgäng z Hawaii hetmer gär nöd chönna vorstella dasses dermassa schlächti Sichtverhältnis git, well döt hani s Gfühl ka, mer hät so wiit gsä wiamer halt gsä cha under Wasser. Uf jedafall isch denn o scho Obet gsä und  mer hond da Wäg zrugg an Sunset Beach under d Füass gnoh. Am Morga wäred mer üsers Material kenna glernt hond, isch zmol da Andy wieder nebet üs gstanda. Er hät gset ka er chem wohrschindli o no uf dia Insla aber well mer ko Empfang ka hond homer nöd gwisst wenner chunnt. Zum Znacht simer denn mit ihm, da Nicole und da Kerly id Sleeping Trees go essa. Nochma Guat-Nacht-Drink im Huba Huba simer ganz noch da Tanja simer Motto: "Sleep, eat, dive, repeat" go pfuusa.
Am Zistig nochem 30-minuta-Jungle-Walk simer ufs Boot und damit zum Coral Reef gfahra. Da 1. Tauchgang isch denn uf 10 Meter Tüüfi ai, hond det unna nomol d Maska halb gfüllt und usblosa und da Regulator usa gnoh. Nochana simer no 50 Minuta dunna bliiba und hond d Underwasserwelt bestunt. Hond rächt viel Koralla, Muschlana, verschiedeni Fisch und en chlinna Rocha gsä. Nochem Uftaucha homer a neui Fläscha aagschlossa, chli Riis inagschuflet und denn simmer o scho wieder inagumpet. Bim 2ta Tauchgang simmer uf 12 Meter ai und hond döt d Maska nomol ganz gfüllt und am Schluss hani mösa de spiela wo ko Luft meh Übercho hät und denn hani da Tanja mim "Retter" sin Ersatzstöpsel gno und denn simer so no chli nebetanand hergschwumma bevor mer denn wieder uftaucht sind. Denn simer wieder dur da Dschungel dschumplet. Isch mega cool, mengmol isches recht ruhig, denn kört mer wieder d Affa schreia und mengmol machid irgendwelchi Grilla an enniga Lärm. Wells bim Tschungel-Tschumpla amel so hochi Luftfüachtigkeit hät und mer derawäg schwitzt, simmer denn nomol a Stündli is Meer ghüpft. Da Kerly sin Kommentar: "It looks like you and Tanja like the sea a lot." Do hätsi nöd unrecht...
Nochma Znacht mitem Andy und da Kerly homer no a Bierli trunka, plauderet und üses Tagebuach/Blog nohtrait...
Am Mittwoch 15.11., hommer denn üsi Tauchgäng Nummer 3 & 4 ka. Bim Nr. 3 simmer uf 12 Meter ai und hond en Baracuda, a Seepferdli und en Pufferfisch gsä, und no viel anderi Fischschwärm. Denn homer no glernt ada Oberflächi und dunna mitem Kompass navigiera. Denn no uf 6m Tüüfi d'Maska abzücha und weder alegga, so umma schweba und i 1 Atemzug mit duurend usschnufa bis ad Oberflächi schwimma. Da mitem schweba isch mega cool. Döt probiertme, dassmer nu mitem Atem immer uf da glicha Tüüfi im Wasser schwebt. Wemmer z tüüf ai chunnt schnuufta mol tüüf ih, denn wend wieder z hoch chunsch, tüüf us. Da isch amel mini Rettig gsä, wenni da Seeigel ufem Grund fast z'Nöch cho bi. Bim letsta Tauchgang homer nünt meh mösa lerna und drumm homers ofach no chönna gnüssa. Sind uf 17.5m ai. Denn nochma Stund simer wieder uftauch, hond no a Föteli gmacht für üsa Uswiis und üsers Logbuach übercho und etz simmer "Zertifizierti Open Water Diver" (und a bitzli stolz uf üs, oder mol i uf mi...). Wer hätte das gedacht... Mit dem Zertifikat chomer etz überall uf da Welt bis 18m go taucha. Ennig cool :)!
Nochem zrugglaufa vom Saracen an Sunset Beach homer nomol chli badet und nochem Sunnaundergang loga und mana Rundi Jazzy simer is Sleeping Trees go essa. Döt machids am Obet amel Family Dinner. Da haast mer cha reserviera und denn hoggid alli mitenand um en grossa Tisch und id Mitti wird s'Essa gstellt und alli chond sich bediena. Mega gmüatlich! Nochem Znacht hond no 2 Wiber a chlini Gitarra und a Trommla uspackt und chli Musig gmacht. Und überem Meer häts gwitteret, isch voll a schöni Stimmig gsä...

Am Donnstig nochem letsta Zmorga uf da Insla homer nomol chli baadet und denn hommer Tanja sei dank mitma Boot um d Insla chönna fahra und hond üsers Gepäck nöd mösa dur da Dschungel träga. D Bootsfahrt isch dafür meh as dopplet so lang ganga als normal s laufa. Nochana homer am Saracen Beach Zmittag gessa, sind nomol a letstmol is Meer gumpet und denn isch s gross Boot cho wo üs mitgnoh hät i 2.5h zrugg uf Sihaboukville. Döt hät üs da Marco üsen Instructor a Tuktuk organisiert wo üs zum Dive Shop gfahra hät. Döt honds zum Glück no a Zimmer ka womer denn mitem Andy bezoga hond. Wemmer z 2ta oder 3ta isch, isches amel günstiger oder glich Tüür wia wemmer imna Dorm pfuusa würid. Denn homer da letst Inselsand abduschet und sind go Znacht essa, Yazzi spiela und wieder am Handy umma drucka. Morn Morga goht üsen Bus noch Phnom Penh. Da Andy chunnt o mit üs mit. Wamer döt no machid wissemer no nöd ganz gnau, irgend ebbis fallt üs denn scho i...
Di letsta Täg sind mega gmüatlich, lehrrich, spannend und entspannend gsä! Genau so wias sött si :)

Uf üsem Tauchschiff mitem Andy Am, wia da Namma seit, Sunset Beach Sunset Beach Überalö häts Hangematta, sogär im Tuktuk inna spannids amel ohni, dass chond schlofa wens ko Kunda hond Mitem Marco üsem Instructor Am Saracen Beach, vo do hät üsers Boot amel abgleit

Sihanoukville

10Nov2017

Nochma Zmorga im Hostel simer mitma Büssli abgholt und in Hafa brocht wora. Döt hät üsers Boot denn irgendwia nöd recht wella und da Käpten isch denn ofach butz agleeta mol is Wasser gumpet zum loga wa s Problem isch. Irgendwenn simmer denn los tötterlet und a halbstund spöter uf Rabbit Island gsä. Denn homer wella um d Insla umalaufa, nochem 2ta Strand und eppa 2km vo 6, homer aber mösa kapituliera well irgendwia kon richtiga Wäg meh witerganga isch. Nochana homer gläsa dasmer für di restlicha 4km wohl 2-3 het mösa iiplana wells so dur da verwachsa Wald goht. Zum Glück homer umkehrt ka, well bis mer zrugg gsä sind am Hoptstrand häts gfühlti 40 Grad ka. Am Strand häts so Hüttli ohni Wänd aso ofach en Boda, 4 Stütza ida Egga und a Strohdach oba druff ka und a allna 4 Siita a Hängematta ufghengt. Do hani nochem Zmittag min Bestimmigsort gfunda woni bis zuda Zruggfahrt o so guat wia numma verloh ha. (Hani scho erwähnt dasi Hängemattana mag?) D Tanja hät sich Schnorchelsacha gmiatet, isch aber voll enttüscht wora, well s onzig wosi gsä hät en Krebs gsä isch und da bevor si Tauchbrilla überhopt a ka hät. Nochdemi mis halb Buach glesa ha isch o scho wieder 4i gsä und mer sind mitem Böötli wieder zruggtuckeret. Da isch glob da bis etz heissischt Tag gsä. I ha mi kum möga bewega und bi um jedes Lüftli froh gsä wo ganga isch. Nochma wohltuenda Duschi (im Bacoma wo vomna Schwizer gfüahrt wird, häts sogär Warmwassertuschana) isch denn da Andreas verbi cho. Ihn kennemer vom Pfadi-Kantonslager 2012 wo döt stattgfunda hät wo er gwohnt hät. Denn simer mitem wieder Richtig Krebsmarkt ina Resti go essa. D Tanja und i hond üs an Riesafisch gönnt und da Andi Krebs. Er hät üs denn vo sinra Halbjöhriga Reis verzellt wonen uf China, Malaysia, Tibet, Vietnam und etz Kambodscha gfüahrt hät. Find da mega cool wemmer so lang allo cha reisa! (I wär en z'grossa Schisshaas) Womer denn alli satt und müad gsä sind, homer üs wieder uf da Homwäg gmacht. Uf da Insla womer üses Tauchbrevet macha wend, treffemeren denn wohrschindlich wieder, weller o no paar Tauchgäng wett macha.
Am Fritig hät da Wecker scho am 6.45 Uhr gschället und nochem Zmorga siner loszoga uf a Wanderig im Kep Nationalpark. Isch so e Rundwanderig gsä vo fast Meereshöchi uf 140müM und eppa 8km lang. Dur da Wald isches voll schö gsä obwohl mer ko anderi Tier gsä hät als Gekos und dia siaht mer eh a jedem Egga. Di letsta 1-2km wärid denn dur s Dörfli ganga, döt homer aber a Tuktuk gno wells ofach a da pralla Sunna gsä isch. Nochana homer bim Michael da Bus für d Wiiterfahrt noch Sihanoukville reserviera loh. Hond nard vor ka zum am Mittag loszücha aber isch erst am 3 on gfahra. Drum simer nomol Richtig Krebsmarkt go zmittag essa und denn homer chli gwartet und glesa. Nochana isch d Fahrt losganga. Üsa Fahrer isch glob des Leben müde gsä, chamer sus nöd erklära, wiamer 5 nöch ufanand fahrendi Lastwäga wett überhola wemmer da Gegaverkehr scho siaht. Zum Glück häts nebet da Stross no 2m Staubpista, sus wärid alli entgegakommenda Roller und Tuktuks im Graba oder frontal i üsem Büssli glandet. Ohni mis Buach woni mi damit ha chönna ablenka, hetti dia Fahrt glob nöd ohni Todesängst ummibrocht. Noch 2 Stund Höllaritt simmer z Sihanoukville sogär no im Hella acho. Dia Stadt wäri fortzua vo Chinesa ufkooft, wo überall Höchhüser häri setzid. Nu usserhalb bida Stränd Otres 1 & 2 hegs no europäischi Tourista. Döt isch o üsers Hostel. Mer hond denn no 2 dütschi Mädels aquatscht wo zum Glück i di glich Richtig hond mösa so dassmer üs a Tuktuk hond chönna Teila. Aber zersch homer üs mol mösa mitem Fahrer uf en Fahrpriis einiga. Mür hond üsu ganza Handelkünst und Argument uspackt aber er hät kum nohgeh. Irgendwenn simer denn davo gloffa und denn hätter da letst Dollar no nohgeh. Denn simer mit dem Spezialtuktuk losgfahra. Für dia wo nöd wissid wa Tuktuks sind, da sind so "Ahänger" mit 2 Rädli wo anen Töff oder Roller anagängt wärid. Vilicht chani unna no a Föteli anahenga. Uf jedafall isch da Tuktuk speziel gsä wells nard a Auto isch wo da Hinderteil oba antrennt isch und denn ofach so Tuktuk obadruff gsetzt wird. Siaht mega lustig us. Wemmer nomol os gsend momer mol a Föteli macha. Da Gfährt hät üs denn Richtig Hostel brocht, aber nöd chönna anafahra wells so Dräckhüüfa uf da Stross ka hät, wellsesi neu machid. Denn simer losgstampft. Stampfa isch s richtig Wort. Sind immer igsunka und d Flipflops sind im Matsch stecka bliba. Irgendwia homers denn barfuass is Hostel gschafft. Da Flip hät ofach eppa 2kg Matsch dra ka und da Flop mindestens genau so viel. Üsers Hüsli stoht uf Stelza und i ha scho Angst dass d Müüs oder Ratta wia im Stelzadorf Nzulezu z Ghana wieder a nächtlichs Wettrenna durs Zimmer veraastaltid. Da Tanja sin Kommentar dazua: "Zum Glück ha i Ohropax." Wohrschindlich standi wieder di ganz Nacht Ängst dura und si verwachet am Morga und hät nünnt vo allem mitübercho. Jenu, immerhin homer a Moskitonetz, da isch scho letstmol mini Rettig gsä womer di eint Muus uf sBett ui gjuckt isch. Zum Znacht simer ina Resti wo als Nr. 3 vo 151 uf Tripadvisor ageh gsä isch. Hond definitiv eppis anders erwartet als a chlises Resti mit amana weedrauchenda Bedienig wo usgsä hät, als ober überhopt nünt meh voda Wält mitüberchunnt. Wammer gässa hond wissemer bis etz nöd, well Tanja und i ebbis underschiedlichs bstellt hond aber bedes glich usgsä hät. Aber fein (und a Müü z scharf für mi) isches gsä. Nochana simer dur da Schlamm is Hostel gwatet womer no ida Bar ebbis trunka hond. D Stross gsäch anschinend jedesmol nochem Rega us wiana onzigi Schlammpista. Mür hond aber a huara Gaudi ka bim Homlaufa. Morn logemer mol wia da Quartier bi Liacht usgsiaht, söll voll schö si mit luuter so Flüssli...

Üsers Hüsli z Kep Uf Rabbit Island Mmh Fisch! Uf üsera Wanderig

Kep

08Nov2017

Nochdem mer am Mittwoch usgschlofa hond simer mitem Tuktuk uf Kep und hond döt im Bacoma üsers eiga chli Hüttli bezoga. Hüt isch mega heiss gsä, und üsa Tag isch underem Motto "Essa und schwitza" gstanda. Entsprechend simmer wieder zum Krebsmarkt. D Tanja hät sich Fried Shrimps mit Gmüass und i mir grillierti Shrimps gönnt. Patrick da wär dis Paradies do. Mittlerwiil isches scho 3 gsä und well mer nöd gwisst hond wamer mit dem agfangna Tag no gross macha söllid, simmer nomol an Strand go planscha, sünnala und lesa. Nochma feina Znacht schribemer Blog und Tagebuach. Morn gomer uf Koh Tonsay (Rabbit Island) womer söll chönna schnorchla und entspanna. Aso wianer gsend lommers üs guat goh...

Kampot

07Nov2017

Nochma Zmorga im Hostel simer vom Tuktukfahrer Sovan abgholt wora. Denn homer üsi Ganztagestour gstartet. Da Afang hät da Phnom Chnork gmacht. Da isch wieder so eppis Tempelartigs imana Höhli gsä. Danoch simer zum Secret Lake gfahra. Isch s Meist uf rota Staubstrossa gsä, und dur Riisfälder und Dörfli ganga. Überall hät mer wieder ebbis gsä, segs an Töff mitma Bambuschäfig mitma Riesasau hinna inna oder d Goofa wo alli "Hello" schreiid. Denn simer ufa Mango und Pfefferfarm. Dia Mangos wärid no am Bomm i so wia Papesäckli packet, damits gega Biena und Wespel gschützt sind. Hät mega lustig usgsä. Denn hät üs da Sovan vom Pfeffer verzellt. Zersch ischer grüa, ennig chaner nu eppa 1 Wucha frisch gessa wära. Nochana wemmeren ada Studa loht und d Hälfti vo dem Zotteli rot und di ander Hälfti no grüa isch wärids abgnoh sortiert, kochet und tröchnet. Denn gits usda grüana Körner da schwarz Pfeffer und di rota Körner blibid rot. Wenn di rota Körner vorem tröchna gschellt wärid, wird druss nochem tröcha da wiis Pfeffer. Denn gits no a 4ti Art, da sind so Schota wo a Mischig zwüschet Pfeffer und Chili seg. Isch echt interessant gsä, mer hond gmerkt dassmer davor kon Plan ka hät wia dia Körner wachsid. Noch dem Pfefferfarm bsuach hond üs d Tuktuks zum Krebsmarkt vo Kep gfahra. Dlt hättmer frischi Shrimps, Muschla, Fisch und Krebs könna chofa. Mür hond üs denn für 2 Krebs entschieda und dia sind denn mit viel grüanem Pfeffer ida Pfanna glandet. Dazua hommer Riis gässa. Womers mol chli dussa ka hät, wiamer s Fleisch us da Schala bringt, isches echt guat gsä, aber hät scho nöd viel dra a somna Chräbsli. D Tanja hät denn gset si weli mol no so en Fisch und i wett unbedingt no Shrimps essa (wär min Blog scho vo Hawaii kennt, waas wia fest i (Garlic)Shrimps liab). Drumm homer entschieda, dass üsa nögst Stop nöd wia vorana mol adenkt Koh Kong wird, sondern Kep. Nochem Zmittag ufem Markt simer an Strand gfahra und hond döt da Nomitag verbrocht. S'Wasser isch seichlau gsä und s hät tutsch ko Wälleli ka. Am Obet simer wieder richtig Kampot gfahra, underwägs hät üs da Guide no d Salzfelder zaaget. Döt wird wäred da Trochaziit wäred 3 Mönet us salzwasser Salz herstellt.
Nochdem mer üsi frischgäscha Wösch abgholt hond und üs en europäischa Znacht im Hostel gönnt hond, hommer no chli plauderet und Tagebuach und Blog gschriba...
Morn gohts witer noch Kep womer a Hostel ida Nöchi vom - wia chönnts o anderst si - Krebsmarkt usgsuacht hond. Let's eat seefood! :)

Countryside Countryside Grüana Ofeffer uf da Starling Plantation Pfefferfarm Long pepper Ufem Krebsmarkt Ufem Krebsmarkt Ufem Krebsmarkt Salzfelder Üsi frisch gwäscha Wösch Meet and greet mit Mr. Crabs aka Zmittagessa Do hätsen gno de arm Cheib! Leckerschmecker - Krebs mit grüanem Kampot Pfeffer

Battambang - Kampot via Phnom Penh

06Nov2017

Da Sunntig homer no mit viel nünt to verbrocht. Es hät da ganz Tag mega fest gschüttet, endlich hommer üser Buach mol chönna brucha ;). Zum Znacht simmer wiedermol ina Resti wia eigentlich jeda Mittag und Obet. Meistens gits do Riis und Nudla mit verschiedana Gmüass und Fleisch. So a Portion kostet meistens umdi 3$. Für en durchschnittlicha Znacht mit teilta Vorspies, je a Portion Hoptgang, a grossi Fläscha Wasser und je a Bier (0.75$), lommer meistens zemma so 10-12$ ligga. Aso mega günstig, aber mer chönnt o no biliger essa wemmer wür wella. Natürlich o türer. Zum Dessert am Sunntigobet simer is Jan Baai. Da isch a Restaurant wo mitma Projekt irgendwia zemma ghört.  Mit dem Projekt wends d'Tourista ufklära, und uffordera, dass nöd i Waisaheim gond und Geld spendid. Well 80% vo dena Goofa hond no Eltra aber wärid voda Familana trennt, damits imna sotiga Waisaheim gsteckt wära chond und d Tourista us Mitleid Geld spendid wa aber nu dena "Waisaheimbsitzer" und nöd da Goofa z guat chunnt. Scho no krass...
I dem Restaurant häts en ennig guata Schoggichuacha geh, etz isch üsera Schoggihuushalt für en Moment wieder i Ordnig. Denn homer wiiter uf usera Pickup gwartet. Ida Zwüschaziit hond üs alli verzellt, wia gföhrlich und schlächt dia Nachtbüss sind und spötestens nochem Bewertiga lesa (2*/5*) uf Tripadvisor hani numma so a guats Gfühl ka. Wo denn aber s Tuktuk üs am 11i abgholt hät und döt inna 4 europäischi Mädels womer am Vortag bida Batcaves kenna glernt hond, ghogget sind, hani denkt da wird scho guat cho. Denn simer zu dera Bushaltestell gfahra wora, womer in Schlofbus umgstiga sind. De Bus hät ofach ko Sitz dinna, sondern so a Art Stockbett. Links und rechts vom Gang liggid je 2 Lüüt. Sprich s Bett (für 2 Lüüt) isch eppa 90 cm Breit und 1.70 lang gsä. I ha gad chönna gstreckt (aso ohni Arma ufaheba :p) dinna ligga. Gottseidank sind d Tanja und i nöd so gross ;). Denn simmer loosgschaucklet. Erstundlicherwiis simer glob sogär paar mol igschlofa, aber leider homer nöd so guat pfuuset wia oni vo Holland wo z Phnom Penh verwachet isch und gmont hät: "Where are we?" "In Phnom Penh." "Really? Can this bus take me to Holland. It's so much better than a plane." :p Ida Hoptstadt simmer am 5i usgstiga und  theoretisch hettemer 1.5h mösa warta sind denn aber erst am 8i mit Tuktuks abgholt wora zumna Standort vomna andra Busundernehma. Vo döt simmer denn mitma normala Bus nomol eppa 4h noch Kampot gfahra. Etz simmer do "wo der Pfeffer wächst". S Umland vo Kampot und Kep isch bekannt für sin Pfeffer. Nochma Nomittagsschlöfli, hommer s Städtli chli erkundet, üsi Dreckwösch id "Wäscherei" brocht und danoch a Tour für da nögst Tag buachet. Morn wemmer go dia Pfefferfarma aluaga. Denn simmer no go Znacht essa und hond de Tag wieder mit nünt to usklinga loh... Im Nachtbus Im Nachtbus Im Nachtbus

Battambang

05Nov2017

Am Samstig homers wieder erst kurz vorem Mittag usem Hostel schafft. Bim Zmorga hommer no so en Tütscha kennaglernt, wo do wett so a Komuna ufbaua, wos denn ida Gmeinschaft lebid, und chli Züüg aabauid. Z Dütschland wohner mietfrei und er bsitzi eh nuno Kleider und sus nard nünt meh. En rächta Hippie gsä. Er hät üs aber viel Tipps geh. Denn hommer a Tuktuk gno für bis am Obet. De Fahrer hät zwor kum Englisch gredet aber er hät üs alles wella zaaga und erklära. Zersch hätter üs amna Palast usaloh, nochana bima so alta Huus wo üs a Frau drüber verzellt hät, wer döt gwohnt hät, wia dases ufbaua isch, dass d'Bewohner voda Rota Khmer entfüart wora und zum Teil ermordet wora sind und di Überlebenda denn wieder zrugg cho sind nochem Krieg. Rächt interessant gsä o wemmer sich meeega moss astrenga zum dena sis Englisch z verstoh. Di meista o wens guat Englisch redid hond so en starcha Akzent dassmer mengmol s Gfühl hond sü redid Khmer. Noch dem Huus hät üs da Tuktukfahrer a Hängebruck über da Fluss zeiget, wos baua hegid well d Schualgoofa amel uf di ander Siita vom Fluss id Schual hond mösa und denn mengmol mit da Böötli kenteret sind. Döt isch üsa Fahrer o ufgwachsa. Danoch häter üs a muslimischs Dorf zaaget. Denn simmer wiiter dur Riisfälder zum Banantempel. Underwägs häter üs no so Bambusrohr kooft, womer hät chönna da Bambus wägrupfa und denn isches mit süassem Riis und Paar Bohna gfüllt gsä. Isch ächt guat gsä und ohni ihn hettemer nöd usagfunda, was mit dena Bambusrohr uf sich hät. Denn isches wiiterganga zumna Bomm zmittzt imana Dorf wo so riesigi Fledermüs draghanget sind. Dia haasid wohl Fruitbat und sind sicher so 20cm gross gsä. Hät mega lustig usgsä wennsesich gstreckt hond. Ha gad mösa googla, dia tegid sich anschinend ned wia üseri Fledermüüs mitem Echolot orientiera, sondern mitem Seh- und Gruchssinn. Da nögst Punkt uf üsera Tour isch da Sompov Mountain gsä. Döt hommer üs 2 Töff mit Fahrer gschnappet und sind damit uf da Berg ufadüüset. Bi huara froh gsä homer nöd mösa laufa, isch scho no steil gsä. Doba hommer d Affa zuagloget wo ummaturnt sind und 1 vo üserna Fahrer hät üs denn ummagfüahrt und üs einiges verzellt. Zersch simmer bida Killing cave gsä, döt hegids füahner dinna Theater ufgführt, ida Ziit voda Rota Khmer sind aber denn döt Lüüt id Höhli abagworfa wora und döt gstorba. Dodavo hond o 2 Glaskubus züügt wo mit Schädel und Chnocha gfüllt gsä sind. Scho no iidrücklich...
Nochma Stärkig imna Restaurant simmer denn ana Stross abaghogget wo scho Duzendi anderi Lüüt uf a allabendlichs Ereignis gwartet hond. Da Uusflug voda Fledermüs. Ida Batcave lebid wohl einigi Milliona davo und jeda Obet eppa um di 6i Strömid dia usa und verteilid sich im Land. Zersch hät mer nu s Schreia vonena ghört und denn zmol häts a gfanga. I om riesa Strom sinds usagschossa cho, aber noch eppa 10 Minuta isches z dunkel wora und mer häts numma guat gsä. Aber es gengi amel eppa 40 Minuta bis zumena Stund bis de Strom ufhört. Ennig vieeeeel! Da isch da letst Punkt uf üsera Tour gsä und drumm simmer danoch zrugg is Hostel. Zum Znacht simmer ina Resti (Tacos und Nachos noch 5 Täg Riis und Nudla) wo vo iiheimischa Studenta gfüahrt wird. Döt homer denn a Lektion Khmer übercho, de Student wo döt im Moment schaffet, isch mega gspröchig gsä. Nochana hommer a eppa 50 jöhrigs Päärli vo Holland kenna glernt und denn simmer mit dena no paar Stund dötghögglet und hond üs super underhalta. Isch amel lustig gsä well ina sis Englisch o nöd perfekt gsä isch, denn hondsesich amel uf Holländisch abgsprocha wenn eber nöd gwisst hät wianer ebbis söll formuliera, genau wia d Tanja und i wemmer amel aastond. Hond würklich an gmüatlicha Obet gnossa...
Am Sunntig simer nochdem mer Geld abghoba hond (wa machemer nu mit dena 100$ Nota wo usacho sind?) gmüatlich go Zmörgela. Für de Tag homer nünt vor und es isch mega am regna drumm tomer ofach mol chli nünt. Am Obet fahremer denn mitma Nachbus uf Kampot. Mol loga wia da funktioniert...  Da Banantempel nochdem en Tanja und i wieder ufbaua hond:p jeden Tag eine gute Tat :) Äffli bida killing cave Ufem Markt Ufem Markt Riisfelder Fruit Bat - Riesafledermüüs

Siem Reap und Battambang

03Nov2017

Am Donnstig hommer bis am 9i pfuuset. Danoch im Hostel Zmorga gessa und am halbi 12i homers denn fangs usa gschafft. Mitma Tuktuk simmer is Angkor Nationalmuseum. S hät viel Infos über Tempel, Buddismus und Hinduismus und Buddhastatua ka. Wellmer nöd so Lust ka hond zum üs astrenga zum dia Infos uf Englisch lesa, hommer halt meh d Bilder und so agloget. Danoch simer Richtig Hostel und döt no ina chlises Restaurant. I ha mit mim Aubergina Chicken an Glücksriff glandet, d Tanja mit ihra sina Fresh Spring Rolls ehner weniger. Es isch nu so a rohs Rüabli- und Gurkastängeli mit vieeeeeel Koriander ina Riisblatt iigwicklet gsä. D Tanja hät sich denn zwunga zum 2 essa well mers doof gfunda hond zum da ganz Teller wieder zrugg z geh. Aber siti do bi, weissi wani würklich gär nöd cha schmecka, dä Koriander. Uf jeda Fall simer denn is Hostel wo sich d'Tanja no a Portion fritierti Früahligsrolla gönnt hät. Denn simer mitema Büssli abgholt wora zumna Floating Village Tour. Nochma Stund Fahrt zum Tonle Sap (da grösst See vo Südostasia) hommer uf a grosses Boot gwächslet. Mit dem simer denn nomol eppa a 3/4h gfahra. Da Städtli womer gsä sind hät Kampot Phluk ghassa und hät eppa 5000 Iiwohner. D Hüser sind alli uf Stelzana wo eppa 3-4 Meter usem Wasser gragt sind. Well etz gad s Ende vo da Regaziit isch, häts en  hocha Wasserstand. Ida Trochaziit söllid dia Hüüser 6-7m überem Wasserspiegel si. Da Städtli chamer ned mit üsem Stelzadorf z Ghana verglicha. D Hüser sind alli mega gross gsä und jedes alleistehend und nöd dur Steg verbunda. Sprich wend scho nu zum Nochbur wetsch, mosch mitem Boot goh. (@d Haslers: I stell mer gad üsi Whatsappunderhaltiga vor. "Isch s Boot dahom?" "Nei" "Aber i bruchs hüt obet" oder "Chunsch hom uf da Znacht?" "Jo wia? Ebber hät mis Boot klaut" :p) Uf jedafall  homer denn aglet und hettid chönna uf a chlisses Padelboot umstiga. Seb homer aber ko Lust ka und drumm simer uf dera Plattform bliba. Irgendwenn simer denn ina Resti ina ghogget. Zmol isch mer ufgfalla, dass alli Paddelboot leer zrugg zu üs chomid und üsers Boot o wäg isch. Denn homer ona aghaua. De hät denn mitma Frau gredet und denn häts chli Unruah geh, alli hond Khmer gredet und zwüschet duri wieder uf üs zaigt. Irgendwenn häts denn ghasa mür söllid i so a Paddelboot hogga si fahri üs döt ana. Denn simer glob sThema Nr. 1 gsä. Well mür sind geg da Strom gfahra und üsi Paddelfrau hät glob allna verzellt, dasmer vergessa wora sind und denn honds amel gschmunzlet. Womer denn bida andra Plattform acho sind homer gad di letsta vo üsem Boot gsä usstiga. Denn homer aber mösa warta well mür jo  di falsch Richtig gloget hond und alli andra zersch hond chönna usstiga. Üsa Guide hät üs denn aber entdeckt und denn simmer beruhigter gsä, dass üs nöd döt vergässid. Denn usa usem chlina und wieder ufs grosse und denn simmer no wiiter uf da See gfahra go da (dasmol vorhandeni) Sunnaundergang loga. Nochana simer wieder zrugg tuckeret, is Büssli gstiga und is Hostel gfahra. An Iiheimischa hät verzellt dass a em Tag s Waterfestival afang. Söll wohl s Fäscht zum End voda Regaziit sii und um dia Ziit söll da See sini flussrichtig wächsla. S onzig womer davo gmerkt hond isch, dasses no vieeel me Lüüt uf da Strossa ka hät und am Fluss no häts viel Liachter ka. Nochem Znacht simer zrugg is Hostel womer da Rucksack packt hond für üsi Wiiterreis mitem Boot uf Battamgang...
Am Morga am 6.30 hettemer sölla abgholt wära, am 7.30 simmer all no döt ghogget. Irgendwenn isch s Tuktuk glich no cho. Mer sind denn damit zumna Bus brocht wora, dä isch aber scho voll gsä drumm häts wiedermol rotlosi Gsichter und a ummatelefoniereta geh. Denn isch en 2ta Bus cho wo o num viel Platz ka hät (zGhana hettmer di übriga 4 Lüt fix o no döt ina gmoschtet). Do häts denn ghaissa 4 chönid no mitem Tuktuk goh. I bi denn mitem grossa Bus mitgfahra woni a Spanierin mit guatem Englisch kenna glernt ha. D Tanja hät sich im Tuktuk mit Franzosa mit schlechta Englischkenntnis probiert zum underhalta. Acho simer denn zum Glück am glicha Ort. Döt ab ufs Boot womer di nögsta 7-8h mit Usnahm vomna churza Pausa o bliiba sind. Am Afang isches über da See ganga und nochana so am Fluss no. Mengmol häts usgsä as obs no en See wär, mengmol isches nuno en Kanal gsä. Da See isch ida Trochaziit nu eppa 1/4 so gross wia ida Regaziit. Überall homer so chlini Dörfli gsä, wo d Hüüser gschwumma sind. Ida Trochaziit gengid dia denn meh is Seeinnere und ida Regaziit meh ad Flüss usa. Do isches viel authentischer gsä as uf üsera Floating Village Tour. D Goofa hond amel huara Fröd ka wenns üsers Boot gsä hond und hond amel kum meh chönna hööra winka. D Hüser sind o viel chliner und ärmlicher gsä as bida andra Tour. Noch eppa da Hälfti voda Strecki, isches mengmol rächt eng wora. Mür sind zwüschet Bömm gfahra wo ida Trochaziit wohl ufem Land stond aber etz zmittzt im Fluss. Mengmol isch da Abstand zwüschet da Äst vo dena Bömm chliner gsä as üseri Bootbreiti. Denn häts üs dia Äst gad no um d Ohra gfitzt. O mol simmer fast hanga bliiba mitem Boot und  mer het chönna mona mer rupfid da Bomm gad us. Am Schluss häts denn wieder meh Platz ka. Da Spruch vom Tag hät mis Reisegspänli noch eppa 4h voller Seele baumeln lassen, schlofa, essa und ummaluag brocht: "I ha a Buach dabi, aber i ha gär ko Ziit zums lesa!" Find de Spruch beschribt dä Tag rächt guat. Z Battambang homer 3 Hostels abklapperet. Erst s letst hät Platz ka. Womer mol a Tuktuk gno hond zum vom einta zum andera cho hät de Tuktukfahrer ned Englisch chönna, drum häter üs gestikuliert mer söllid schnell warta. Denn häter ebbertem aglütet. Dem hani dem am Telefon erklärt womer ana wend und er häts denn am Tuktukfahrer wieder uf Khmer übersetzt. Man lese und staune, zack simmer vorem rechta Hostel gstanda. Nochem Iichecka und ma Duschi simer ina Resti go Znacht essa. 6$ für 2 Portiona Essa + Icetea. Danoch homer üs no en Crepe gönnt. Nochma Bier ida Buffalo Alloy simer zrugg is Hostel und hond no Blog gschriba und mit da Kamera kämpft. Gemäss da unnastehanda Bilder homer wohl gwunna. Mür IT Spezialista :p @Ramon: Danka für da Tip mitem Boot. Isch a rächts Obentüür gsä :) Uf Floating Village tour Sunnaundergabg ufem Tonle Sap See Floating Village Tour Bootsfahrt Siem Reap - Battambang Üsers Boot

Di ersta Täg :)

01Nov2017

Am Mentig Mittag sind Tanja und i losgfloga über Bangkok uf Siem Reap. Da erst Flug isch 1 Stund z früah acho und so hommer schö daziit ka zum umstiga. Beidi flüüg (Thaiair) sind recht entspannt gsä. Am Morga am 8.15 homer s erst mol Kambodschanischa Boda under da Füass ka. Mür sind 6h vor da Schwizerzitt. Denn homer döta s Visa on Arrival gmacht. Hond nöd mol 10min mösa astoh, üsi ersta 30$ usgeh, denn isch da Pass dur eppa 7 Päärli händ gloffa, jeda hät en Stempel inigfitzt und denn homer o scho chönna s Gepäck hola. Dussa homer a Tuktuk gnoh zum Hostel. Tuktuk fahra findi fast so cool wia Trotro fahra. Mer hät ofach viiiieeeeel meh Platz und en küahla Luft aber es isch fast glich abentüürrich. Denn hommer is Bonzahostel iicheckt. S hät sogär en Pool ufem Dach und mer zalid 9$ pro Nacht im 4er Schlag. Nudelfertig wiamer gsä sind, simer a Rundi dur d Stadt gschlenderet und danoch chli an Pool gläga. Zum Znacht simer denn ina ehner tüür ussehends Restaurand womer aber doch nu 5$ für Curryriis, Wasser und a Bier zahlt hond. Dia Priisa machid Ghana Konkurrenz. Am 7i simmer im Bett gsä und hond bis am 4i durapfuuset. Vorda 5i hät üs da Saray üsa Tuktuk Fahrer abgholt für a Tempeltour. Mür hond uf da Sunnaufgang bi Angkor Wat wella si. Da Saray hät üs denn döt womer Itritt chofa hät chönna usaloh und nochana wieder ufglada. Denn simmer zersch d Tempel vo Angkor Wat go aloga. Da Sunnaufgang hät mer nöd gsä wells z bewölkt gsä isch aber isch glich mega iidrücklich. Mega grossi Bauta mit u schöna Verzieriga (und 10000 Tourista). Nochana simmer mitem Tutuk witer noch Angkor Thom. De isch nöd so gross wia Angkor Wat aber glich mega idrücklich. Denn simmer no
Bayon, Ta Prohm & Bantdeay Kdei go aloga. Angkor Thom hät mega schöni Verzieriga ka, Bayon hät so grossi Gsichter in Stoo gmeislet, Ta Prohm isch so mega verwachsa mit riesiga Bömm wo d Wurzla über d'Stöä usgond und dur Bantdeay Kdei simmer scho fast "Tempelbeduslet" duragloffa. Isch recht  aatrengend gsä. Da Fahrer hät üs amel uf onra Siita bim Iigang usglada und gset er holi üs uf da andra Siita ab. Und prompt ischer jedesmol sobald mer uf de Tuktuk Platz cho sind, noch Sekunda scho winkend vor üs gstanda :). Im Nomitag inna simmer tutsch erledigt zruggcho und hond üs nochma Zmittag an Nomittagsschlof gönnt. Danoch simmer go Znacht essa, ina Bar ada Pubstreet go a Bier trinka, hond mitma Australierin quatscht und denn simmer no chli ufem Nachtmarkt go lädala. Etz hauemers denn is Bett... Noch 2 Täg Siem Reap sind sich Tanja und i einig: Mür mögids!

 

Bilder hommer di meista uf da Kamera, drumm do paar schlechti vom Handy :p

 

Morn gohts endlich los!

29Okt2017

So nochma lustiga Obet mit guata Lüüt am Samstig hanis hüt o no gschafft zum fertig packa. Wia immer uf di letst minuta. Am Mentig am 13.15 flügemer los über Bangkok uf Sieam Reap. Döt bliibemer mindestens 2 Nächt und denn gohts wiiter. Wo ana wissemer erst ungefähr. Noch 2 Wucha wemmer uf Koh Rong Samloem da Tauchschii (open water diver) macha. Da Räst gsemmer fortzua. So 3, 2, 1...

Auf dieser Seite werden lediglich die 10 neuesten Blogeinträge angezeigt. Ältere Einträge können über das Archiv auf der rechten Seite dieses Blogs aufgerufen werden.