Cambodia is calling and I must go :)

08Sept2017

Wia d Überschrift scho seit, goht's bald uf Kambodscha! Mit da Tanja vom 30. Oktober bis am 20. November. Zersch flügemer uf Siem Reap und a Schluss vo Phnom Penh zrugg. Sus isch no alles offa. Vorfreud, Vorfreud, Vorfreud!!!

The last 4 days in paradise...

08Jan2017

Am 3. Januar simmer no da Westküsta noh uf Lahaina gfahra. En Teil voda Stross hetma anschinend nöt töra mitem Mietauto fahra, aber häts sich ächt glohnt ka, isch choga schö gsä. Am Obet simmer denn uf da Sunnaufgang uf da Haleakala ui. So isch da högst Berg vo Maui mit glob eppa 3500 Meter. Zum Glück simer früah gnuag gsä, hät nemli viel z wenig Parkplätz ka. Doba simmer denn halb verfroora. Sobald d Sunna wäg gsä isch, sind di meista Lüüt gad wieder ganga. Mür hond no gwartet wellmer denkt ka hond, dassmer vilicht no d Milchstross gsiat. Eni hätmer leider nöd gsä, dafür hät da Horizont nochdem d Sunna und Lüüt wäg gsä sind mega schö usgsä! Nochana simmer zrugg is Hostel düüset.
Am 4. Januar hommer no üses letdt gross Obentüür i Agriff gno. D Road to Hana. Da isch a uu kurvarichi Stross da Ostküsta no um d Insla. All paar Meter häts a Brüggli oder en Rank ka und mer hät mösa loga dassmer ned bi jedem "Scenic Point" aghalta hät, sus wärma 2 Täg underwägs gsä. Underwägs simmer no an Red Sand Beach, anderst als da Green Sand Beach hät dä sim Namma alli Ehr gmacht. Denn homer üs mösa entscheida ebmer alles da glich Wäg zrugg fahrid oder a langi Stross womer nöd mit Mietauto töör. Hond us denn für eni entschieda und o bald gwisst wieso dass nöd wend dassmer dia mitem Mietauto fahrt. Zum Teil häts choga Schlaglöcher ka (Ghana lässt grüssen) und meistens isches sehr a schmali Stross gsä mit rechts Felsa und links ischs s Loch ab is Meer ganga. Mer hond definitiv scho entspannteri Toura gmacht aber da isch sicher dia mit da schönnsta Ussichta gsä. I wüürs jedem empfehla! Z Kihei hommer denn no da Sunnaundergang agluaget und denn simer go s Auto zrugg geh. 
Am Donnstig morga homer a Uber an Flughafa gno. Wellmer no vorig Ziit ka hond, hommer denn nomol chli gsünnelet (voll cool wens gad en Strand näbet em Flughafa hät), da Kitesurfer zuagloget und üs no a Sunnabrändli kolt, ii zumindest... Noch da letsta Nacht z Hawaii hommer da letst Tag no mit dur Waikiki bummla, und nochana mit da Lüüt voda Schual am Strand verbrocht. Am spöter simmer denn uf da Flughafa, womer denn halba depressiv wora sind, wellmer checkt hond, dass Obentüür Hawaii bald fertig isch. D Rückreis isch problemlos gsä aber sind glich ziemli froh gsä, womer denn endlich im Zug zrugg is Rhintel ghogget sind. Z Rüthi am Bahnhof bini am Mittag voda Mama abgholt wora und am nögsta Tag am halbi 8i bini zrugg im Büro gsä, und mengmol frogi mi, isch da alles nard nu en Traum gsä? Traumhaft isches mol sicher gsä! Danka Buschi, dassd dia 2.5 Wucha mit mer usghalta häsch, bisch definitiv en super Travelbuddy!
Wia scho bi Ghana hani denkt, dass mis Fernweh denn nochana gstillt isch, aber nei, es isch nu no stärcher wora... Mol loga womi di negst Reis härafüahrt...

Insel Nr. 4 - Maui

02Jan2017

Am 28.12. homer a Wasserfall-Tour gmacht. Zersch zuda Rainbowfalls und denn zuda Akakafalls. D Akakafalls sind recht iidrücklich, sind meh as 100 Meter hoch. Nochana simmer zum Waipiovalley gfahra. Da isch a Tal wo i Privatbsitz isch aber mer ka a Stross ailaufa und denn döt anan Blacksandbeach. Bim ai und ui laufa häts üs mega verschiffet, aber dunna häts chli uftoo. Underwägs homer no zuafälligerwiis da Mike und da Nate troffa wo vorana mit üs zKona im Hostel gsä sind. Sü sind mit 2 Däninna underwägs gsä womer uf da andra Insla z'Maui denn zuafälligerwiis wieder gsä hond. Mer lauft sich do echt durend wieder über da Wäg. Uf jedafall homer denn am Strand chli Föteli gmacht und det häts mega viel Kokosnüss ka. Denn hät üs en Typ oni göffnet, aso so a bruuni, und mer hond si chönna frisch essa. Mega fein! Uf da Obet zua simmer denn chli in Süda aigfahra. Am End voda Stross homer a Velo gmietet (Violetta i vermiss di :p) und sind dia  etsta 7km bis as Meer gfahra. Döt hätmer denn no chönna über di vertröchnet Lava laufa und am Ende hätmer gsä wia dia orange Lava is Meer flüsst. Am Afang wos no hell gsä isch, hätmer nu da Rauch gsä und wos denn dunkel wora isch hätmer d Lava recht guat gsä. Jedesmol wenns wieder gsprützt hät, hät die ganz Menschamengi "woaaah" gsait. Sind wohrschindlich fast 1000 Lüüt deta gstanda, a riesigs Business machids druss... Nochana simmer no locker flockig (ih), beziehigswiis fast sterbend (da Buschi)  wieder zrugggfahra. Da Buschi hät leider da letst Drohtesel vo dera Vermietig verwütscht und es hät o en Grund ka wieso dases de letst gsä isch wos usageh hond :p Zrugg im Creepy-Hostel (wo meh Staff gsä sind as Gäst) simmer denn recht bald is Bett. Am nögsta Tag homer s regnerische Hilo denn zum Glück wieder verloh und sind zrugg zuda sunny side of life. Z Kona simmer a Rundi über da Farmersmarket gschlenderet, Acaibowl go essa, so a Müasli mit Glace, Haferflocka und Frücht und denn homer wieder im My Hawaii Hostel iicheckt. Wenn mis Englisch besser wär, würi gad uswandera und i em Hostel afanga schaffa als Mädchen für alles! Es isch s best und schönst Hostel woni je i mim Leba gsä bi und zwo drü anderi Hostels hani scho gsä ;). Am Obet hommer wieder chli mit da übrig bliibna Crew trunka. Honds mega lustig ka und i vermiss üsers Zimmer "Room 6" jetzt no :). Am negsta Tag hommer definitiv Abschied gno und sind richtig Flughafa gfahra. Döt homer s Auto abgeh und denn uf da Shuttle wo üs ganz an Flughafa brocht hät gwartet. Wias da Zuafall wett homer bim warta d Bernadette und ihren Fründ troffa. Si isch z Honolulu idi glich Schual wia i und sü sind denn mitem glicha Flüger uf Maui gfloga. Döt sinds so liab gsä und hond üs mit ihrem Mietauto zu üsem Hostel am Banana Bungalow brocht. Dooferwiis liit da Hostel uf da Regasiita und es regnet so guat wia IMMER. Isch a relativ grosses Hostel wo für (eventuell chli niveaulosi :p) Parties bekannt isch... A dem Tag homer num viel to usser go posta und inan Subway go Znacht essa. Am negsta Tag simmer ziitig los mitem Bus uf Lahaina, da isch ada Sunnasiita. S'Bussystem do z Maui isch relativ guat. D Büs fahrid zwor nu die grössta Städt ah, aber sü sind ziemlich pünktlich. Z Lahaina simmer chli durs Städtli gschlenderet und denn a Rundi an Strand glega. Am Obet hät d Silvesterparty underem Motto Black and White stattgfunda. I bi am 9i scho halb verpennt und froh gsä, wos denn halbi 1 gsä isch und mer nochem Füürwerkloga mit guatem Gwüssa is Bett hät chönna :p. Am 01. Januar häts gnauso wia di letsta Täg vom alta Johr nu gschiffet und drumm simmer wieder mitem Bus in Süda. Noch 2h z Lahaina am Strand homer üs entschieda no en Hike z'macha. Sind denn mitem Bus a Stuck zrugg gfahra und döt ufem Lahaina Pali Trail gstartet. Isch konstant ufwärts ganga und hät immer chli gnieslet wa aber ganz agnehm gsä isch. Und vorallem häts üs da schönst Regaboga, woni jeh gsä ha, beschert. Er isch mega chräftig gsä und mega lang bliiba. :) Am Obet homer üsra mittlerwiil standartmässig Abstecher in Mc Donald gmacht, wa moralisch verwärflich aber s Billigst isch. Für da zwot Tag vom neua Johr hommer a Whalewatching und Snorkling Tour bi Pride of Maui buachet. Am Morga simmer noch Kihei an Strand (an meeeeeeega langa, schöna Strand). Nochem Mittag hommer denn z'Maalaea bordet und mer sind usagfahra. Underwägs hommer paar Wal gsä. Meistens wens Luuft usapustet hond, paarmol o wos so mit da Schwanzflossa usem Wasser cho sind. Leider hät kona so en richtig coola Jump gmacht :p Nochma Wiili homer denn ida Nöchi voda Küsta an Stopp igleit und döt hätmer chönna go schnorchla. Noch da Hanauma Bay, Kahaluu und Two Step ischmer halt scho chli verwöhnt wa schöni Fisch agoht. Mer hät zwor a paar gsä und o recht viel Koralla aber etz ned wahnsinnig viel. Aber s Highlight isch defintiv a Schildkrot gsä wo zmol uftaucht isch. Bi immerno Schildkrotafan :) Zrugg ufem Boot häts denn Burger und Ztrinka geh und denn hommer nomol Wal gsä, recht nöch am Boot. Mega iidrücklich gsä :) Denn isch o scho bald 5i gsä und mer sind zrugg in Hafa gfahra. Mitem negsta Bus simmer wieder zrugg uf Wailuku is Hostel gfahra und wia chönnts o anderst sii, häts tröpflet womer zum Bus usa sind. Etz schribi no da Blog und denn isch o scho bald wieder Ziit zum is Bett. Für di negsta 2 Täg homer nomol a Auto gmietet zum o no dia Ecka wo ned mitem Bus z erreicha sind z erkunda. Haleakala (Berg), Road to Hana (Stross mit 54 Brucka und mega vielna Kurva), und mol loga wa üs sus no in Sinn chunnt... Uf jeda Fall gnüssemer üsi letsta 4 Täg im Paradies no i volla Züüg... Und denn haissts au scho bald Goodbye Hawaii :,(

Big Island...

27Dez2016

Am 24.12. Simmer am Morga mitem Brandon und da Serina an Hapuna Beach üs go sandstrahla loh. Es hät so gluftet und da Sand hät so gfitzt,  gär ned agnehm drumm simer ned lang bliba. Am Nomi sommer den an Kalahu'u Beach. Döt homer wella go schnorchla und womer inagloffa sind, simmer im chnüütüfa Wasser fast uf paar Schildkrota ui gstanda. Mega lüübi! Hät i dera Bucht rächt viel, mega schöni Fisch ka! Am Obet hommer üs as Heilig Obet Festmenu Fajitas kochet. Am 25. simmer mit da Fiona, Mona, Amelie, Janie, Serina an Soutpoint wo paar voda Klippa gsprunga sind. I hami aber ned traut... Nochana simer Richtig Green Sand Bech gfahra und denn hätmer no a Stund müsa laufa. Da Green Sand Beach isch leider ned so grüa wiamern sich vorstellt. Aber isch glich cool gsä, hät rechti Wella ka. Denn simmer z fuul gsä zum zrugglaufa und es gäb so en "Inoffiziella" Shuttledienst wo 15$ verlangt. Da isch viel z viel wemmer denkt dasmer für 2$ über di ganz Insla cha fahra mitem Bus. Drumm hani denn eina mitma Pickup aquatscht eber üs mitnemmi. Denn er so jo klar isch jo Wiahnacht. Hoggid hinna ui. Da hät denn aber eina vom "Shuttledienst" ghört und hät gseit mür müssid ihn zalla well de ander zerstöri ihna sis Business. Denn hommer gsait nai es machemer ned, denn laufemer liaber. Hond ghofft dass de Typ üs mitninnt, wemmer ofach fang loslaufid. Und so isches denn o gsä. Noch a paar 100 Meter häter üs igholt und gsait: "Jump in". Kurz vorem Parkplatz häter üs den wieder abstiega loh damiten da ander ned gsiat. Mür hond a rechti Gaudi ka uf dem Pickup :p Nochana simmer no an Black Sand Beach. Döt isch da Namma Programm gsä und da Strand isch würklich schwarz! Mega schöö... Mama häsch recht ka, isch echt viel schöner as en "normala" Strand ;). Döt am Strand sind denn ono a paar Turtles ummaglega :) Nochana simmer wieder hom is Hostel gfahra und det hond d Managerinna riesig Znacht kochet für alli im Hostel. Isch mega cool gsä, s isch döta wiana grossi Familie. Jeda kennt jeda und alli redid mitenand. Denn hond a em Obet o no paar mitanand Ukulele und Gitarra gspielt und gsunga. Isch echt en perfekta Wiahnachtsobet gsä :)
Am 2. Wiahnachtstag simmer mit da Sara zersch inan so Park und denn bida Two Steps go schnorchla. Döt häts no rächt viel lebendigi Koralla im Gegasatz zu da meista andrna Riff wo tot sind. Nochem Zmittag im MC mitem Björn (s erste mol z Amerika mit Usnahm voma Mc Flurry womer mol gholt ha) simmer am Nomi mit da Amelie, Janie, Fiona, Mona, Björn, Philippe, Brandson und Sara zu somna "natürlicha" Pool wo aber d Wänd betoniert sind go bada. Honds mega glatt ka mit dera Internationala Gruppa. Italiener, Dütschi, Amerikaner, Kanadier und mür... Spöter simmer denn no an Magic Sand Beach womer üs voda Wella ummaschleudera loh hond... Nochma schnella Znacht simmer fürs Night Mantaray Snorkeling zum Hafa gfahra. Det hommer n Wetsuit übercho und denn simer mitema Böötli a Stuck usagfahra. Denn honds döta so a Surfbrett is Wasser too wo geg unna so a speziells Liacht ka hät. Döt homer üs denn alli ghebet, a Schwimmnudla under d Füass übercho und abgwartet. Dur da Liacht wird Plankton aglockt, wa s Essa vo da Mantarocha isch. Bald isch denn da Erst uftaucht. Sü hond immer so Rollana underem Brett gmacht. Mengmol honds üs berühart und sü sind echt nöch cho mit ihrem riesiga Muul. Det hetti glob gad eppa inapasst :p mega iidrücklich! Hät sich richtig glohnt, ha no nia so was erlebt... Nochma 3/4h oder so simmer denn zrugg an Strand gfahra. Bi froh gsä homer üs chönna alegga, ha nemli recht gfrora. Denn homer a heissi Schoggi übercho und nochana simmer zrugg is Hostel. Döt homer denn am Strand no 1-2 über da Turscht trunka wells da Janie sin letsta Obet gsä isch. Ziemlich spot simmer denn is Bett. Am negsta Tag nochma Katerzmorga homer üs verabschiedet und sind losgfahra Richtig Hilo. Da isch uf da Regasiita vo Big Island. Underwägs homer en Abstecher uf da Mauna Kea gmacht. Isch en 4000er Berg. Sind bis uf 2800 MüM mit üsem Nissanli gfahra. Witer homer aber ned töra wells kon 4x4 isch. Drumm hommer denn a paar Lüüt aquatscht bis di einta gsait hond sü nemmid üs mit. Denn simmer bi ihna hina uf da Pickup ghogget und no ganz ui gfahra. Doba isch recht chalt gsä, eppa 4 Grad, und s hät Schnee ka. Mega cooli Ussicht hätma ka... Nochana simmer wieder abagfahra nochdem üsa Fahrer a Chüalbox mit Schnee gfüllt hät. Da seg so a Hawaiian Thing dass di Iiheimischa wens döt ui fahrid nochana Schnee hom nämid. Zum Bispiel zums am Strand uskippa damit d Goofa mitem spiela chond. Und es sind echt mega viel Pickups wo hinna volla Schnee gsä sind abi gfahra. Crazy dia Amis... If jeda Fall simmer denn wiiter uf Hilo. Da liit uf da Regasiita voda Insla. Zum Glück isch aber nu bewölkt gsä. Z Hilo homer denn ina mega komischs Hostel iicheckt und sind denn go Znacht essa. Nochana simmer nomol eppa 1h gfahra zumna Nationalpark. Döt simmer im dunkla go en aktiva Vulkan aloga. Scho no iidrücklich wemmer so Lava siaht uisprütza :o Jo da wärs gsä für da Moment, mol loga ebis mol schaff zum Fotana ui lada, isch recht müasam mitem Handy. Üsa Plan isch,  zum etz bism 29 do z Hilo z bliiba, denn nomol a Nacht is coole Hostel z Kona und denn flügemer am 30. uf Maui... jaa that's it...

Wie die Zeit vergeht...

23Dez2016

Di letsta paar Tääg bini irgendwia überhopt ned dazua cho zum blog schriba. Drum losi bitz was us und spring zum Fritig am 16.12., mim letsta Schualtag. Noch da normala Stunda isch d Graduation gsä, do sind alli wo di letst Wucha ka hond füra gruafa wora, sisch applaudiert wora und denn hätmer no Fotana gmacht. Mega komisch gsä wommer denn endgültig s letstmol zuda Schual usagloffa sind. Am Samstig hommer wiedermol a Auto gmietet ka und sind ad Northshore. Aber da Contest isch wieder verschoba wora, denn simer ofach kli go ummabummla. Am Sunntig simmer nomol ad Northshore noch dem i us mim Zimmer ida Kaimuki Residence uszoga bi, und denn hät da Contest sogär stattgfunda. D Wälla sind so richtigi Tunnels gsä und jedesmol wenn en Surfer am Ende wieder usacho isch, hät da ganz Strand applaudiert. Es hät meega viel Lüüt ka, mer isch Badtuach a Badtuach ghogget. Am Obet hond mi di andra denn bimma Hostel usaloh woni 1 Nacht übernachtet ha. Bi denn no mit am vom Hostel chli an Strand go Frisbee spiela und bada. I ha a dem Obet meh "nöd-Schwizer" kenna glernt as ida letsta 6 Wucha zemma. Lüt vo Argentinia, Uruguay, Mexiko, Tütschland, Florida, San Francisco,... Am nögsta Tag bini no chli an Laniakea Beach glega und denn habi da Bus zrugg noch Honolulu gno. Underwägs hani no en Tütscha kennaglernt wosich verfahra hät. Und wia sait mer so schö, mer siaht sich immer 2mol im Leba. A Wucha spöter woni mitem Buschi ad Northshore gfahra bi, ischer doch prompt underwägs in Bus inagstiga :o Hond beidi grossi Auga gmacht womer üs wieder gsä hond... Uf jedafall zrigg z Honolulu bini denn is Waikiki Beachside Hostel zoga. Am Obet homer no im Island BBQ gmacht und a mega Gaudi ka. Am Zistig bini denn no chli go Souveniers koofa (wia passt da alles i min Rucksack? :o) und am Nomi mit dema voda Schual an Army Beach. Znacht homer Pizza is Kaimuki bstellt und nochana bini an Flughafa gfahra zum da Buschi abhola. Denn simer schnell is Hostel und denn ab is Mooses. Gad a chli en herta Istiig is Hawaiin Life noch 30h underwägs :p Am Mittwoch simmer früah uf und hond üs mitem Bus uf da Wäg zum Pillboxhike gmacht. Leider häts womer bida Pillboxa gsä sind no chli gregnet wa d Ussicht bitz vermiest hät. Aber zwüschetduri häts doch no chli ufto. Nochana simmer no an Lanikai Beach und denn homer üs entschieda zum no en 2ta Hike zmacha. Sind mitem Bus zrugg noch Honolulu gfahra und denn uf da Diamond Head gloffa. Zum Abschluss simer no chli am Diamondhead Beach go bädala. A dem Täg simmer sicher eppa 15km spaziert und gwanderet. Am Obet simer kurz is Rumfire und denn id Cheesecake Factory go essa. Denn hommer no 9 voda Schual überzoga, dass am negsta Tag am 5i ufstond und mit üs uf da Koko Head wanderid. Hät zwor gschüttet womer am halbi 6i losgfahra sind aber hät zum Glück denn chli besseret. Und ab denn womer losgloffa sind häts numma gregnet. Da Koko Head isch en Krater wo a Schiena ufafüahrt. Dia wird aber num brucht usser zum etz deta ui laufa. Isch extrem astrengend gsä und da erwartet Sunnaufgang hätmer wägda Wolka ned gsä. Underwägs ischmer uf dena Querbalka vod Schiena gloffa wo a Ziitlang eppa 2 Meter überem Boda gsä sind. Es isch mega rutschig gsä und hond scho chli Schiss ka dass üs dazwüschet aiklepft (gäll Buschi :p). Nochem Koko Head sind alli andra id Schual und mür sind mitem Bus ad Nortshore gfahra. Zersch simmer chli dur Haleiwa gloffa und nochana an Laniakea Beach womer Schildkrota gsä hond. Nochana simmer witee zum Pipeline Beach. Döt homer chli gsünnelet und nochma Wili ischmer in Sinn cho, dasses det no en Hike gäbt woni o no ned gmacht ha. Und well dia andra 3 Hikes i 2Täg no ned gnuag gsä sind, hommer denn würklich no da Ehukai Pillbox Hike gmacht. Hond en geniala Usblick über d Küsta ka und da Petrus häts guat mit üs gmont und s Wätter isch no richtig guat wora. Nochdem mer nochma Schlitterpartie dunna acho sind, simmer mitem Bus da Ostküsta noh hom uf Honolulu gfahra. Det is Ala Moana go Znacht ässa und denn no mit dena voda Schual is Rumfire. Ziemli früah simmer denn zrugg is Hostel go pfuusa und am negsta Tag wieder früah ufgstanda zum an Flughafa z fahra und uf Big Island flüüga. Nochma 3/4 stündiga Flug simmer z Kona acho, hond üsers Auto abgholt und sind is My Hawaii Hostel gfahra. Nochdem mer s Gepäck abglada ka hond, simmer no id Kealakekua Bay chli go bädala, denn homer Znacht kochet und üsi Wucha do uf Big Island chli planet. Ufem Programm stoht Mantarocha taucha (honder gwisst dass dia a Spannwiti vo 5 Meter oder so chond ha :o), black, white und green sand Beach, Mauna Kea (4200m hoch) paar Stränd, Wasserfäll und a Vulkantour. Jap that's it...

Hike, Kauai, Surfa, ...

30Nov2016

S Wuchaend vom 19. & 20. November hommer mit Essa und Hike verbrocht. Am Samstig hommer nochdem mer a riesigi Portion Pancakes gässa hond (die spinnen die Amis :P) en Hike (wieder meh Spaziergang as Hike) zumna Wasserfall gmacht. Wells gregnet hät, hät da Bach meega viel Wasser ka und drumm gits ko vernünftigi Bilder davo. Am Sunntig simmer nochemna usgibiga Brunch im Dukes mitem Bus noch Lanikai gfahra und hond da Pillbox Hike gmacht. Dodazua gits nu 1 z säga: Traumhaft!

Nochda Hälfti hani kapituliert... Nochda Manoafalls... Pillbox Hike Pillbox Hike Pillbox Hike Pillbox Hike

Ufem Homwäg simmer wiedermol fast verfrora im Bus. I verstand jo echt ned wieso dia Amis alles mond so krass abachüala. Ohni Pulli gangi nia id Schual und ida Cheesecakefactory hoggemer amel ida Regajacka. Woni ida Schual mol gfroget ha, ebmer d Klimaalag ned chönn chli zrugg stella, hät d Lehrerin gsait nai aber i cha sus loga ebi e Heizig cha uftriiba. Hallo? Echt etz? Wenn alli Hawaiianer ihna sini Klimaalag 5° wärmer stella würid (es wär denn no chüal gnuag), chöntens doch di vorig Energie id Schwiz transportiera und mür dafür üsi AKWs abstella :P. Nu so a Idee :P…

Ida 3. Wucha do, hommer di erst Surflesson gno am Waikiki. Isch mega cool gsä und i ha sogär a paarmol chönna stoh, aber isch chli doof gsä dases nu so hüfttüüf isch und a Riff unna dra isch, sprich jedesmol wensdi abaghaua hät, häsch der ebbis agschlaga oder gschürft.

Am Donstig isch frei gsä wäg Thanksgiving und mür sind z 4ta uf Kauai gfloga und hond 3 Nächt z Kapaa a Appartement ka. Kauai - The garden island. Isch a mega schöni Insla, recht chlii, mega grüa und leider i dena 4 Täg wo mür gsä sind, recht verregnet.  Aber hond doch einiges mit üserem Jeep erkundet. Am 1. Tag Stränd und Wasserfäll, üsers Thanksgivingdinner homer bim Inder ka well sus alles zua gsä isch (inkl. Mc Donalds, Foodland,…), am 2. Simmer ufa Kayaktour (Muskelkater ahoi) zuda Secret Falls, am 3. Zum Waimea Canyon, am Spouting Horn (döt hommer Riesaschildkrota gsä) und an Pipou Beach (döt hommer Robba gsä) und am letsta Tag no ad Na Pali Coast im Norda. Am Sunntig Obet am halbi 10i simmer denn ziemlich erledigt zrugggfloga…

Thanksgiving dinner Üsera Jeep :D Waimea Canyon Waimea Canyon Am Ende vom Waimea Canyon siahtmer d Na Pali Coast Waimea Canyon Sunset am Poipu Beach Sunset am Poipu Beach 1. Advent ada Na Pali Coast S Ziel voda Kayaktour, da Secret Fall Spouting Horn

Am Mentig hommer d Schual gschwänzt wells da Céline (a Französin wo üsa best Grund isch dasmer Englisch redid) sin zwotletsta Tag gsä isch. Sind denn nomol mitma Auto ad Northshore well det die 2 vo 3 grossa Surfcompetition stattfindet. Aber hond leider Pech ka und si isch vertagt wora wells so guat wia ko Wella ka hät. Denn simmer halt a Rundi go lädala und an Strand gläga.

Do-it-yourself-turtle Dä Sunsetbeach...Haleiwa

Hüt homer ida Schual erfahra, dass am Donstig s Ziitfenster für THE EDDIE öffnet. Da isch a riesigi Surfcompetition wo nu gsurft wird, wenn d Wälla grösser as 40-50 Feet, dh. 12-15 Meter sind. S Ziitfenster isch offa bis Ende Februar. De Wettbewerb gits sit 30 Johr aber stattgfunda häter ersch 9 mol well d Bedingiga halt ned immer guat gnaug sind. Wär mega cool wenner stattfindet, weni no do bi, da wär defintiv a Highlight….

Ida Schual gits ned viel neus, a paar voda Klass sind ganga und so simmer etz nuno z 5ta, und es siaht ned us as ob bald no meh chomid. Am Mentig isch sogär ona alo ida Klass ghogget :P

So da wärs für da Moment. See you!

Diamond Head, North Shore & Skydiving, oder uf Dütsch: S Läba gnüssa!

17Nov2016

Am Donstig noch da Schual homer üsi 2. Wanderig gmacht wo da Namma ned so ganz verdient. Isch meh an Spaziergang gsä, uf da Diamond Head, sowas wia s Wohrzeicha vo Honolulu. Isch nard an Vulkankrater und liit kli usserhalb aber mer siaht vo det mega guat uf Honolulu aba...
 
Ussicht vom Diamond Head Richtig Honolulu
 
Ab Obet simmer mol wieder in Usgang ;). Am Weekend bini so guat wia nia dahom gsä, wemmer ned gad mitem gmiateta Auto ummadüset sind, simmer ida Island Colony (a Hochhuus wo a paar vo minra Schual a Appartment hond) im Wirlpool ghögglet.
 
D'Ussicht us da Rina sim Zimmer im 34. Stock
 
Am Samstig simmer mitem Auto an Lanikaibeach (mega schöö!) und den no ad Northshore. Det hät en Surfcontest statt gfunda aber leider simmer am falscha Ort gsä :p Im Norda häts meistens recht grossi Wella. Nochem Mittag hät d Rina no müsa da Polizist chli bearbeita weller üs gad hät wella 2 Buassa schriba womer zruggcho sind. Oni wegem Parka im Parkverbot und oni wegem Überfahra vomna doppelta Sicherheitslinia, mür hond denkt ka da isch üsi Cance womer da leer Platz am andra Strossarand gsä hond. :p S hät denn sogär klappt und mür hond gär ko Buass übercho, vilicht hätter Mitleid ka mit üs vier Blondina:p
 
Sunnaundergang am North Shore
 
Am Sunntig simmer denn no d Blow Holes go aloga, da sind so Löcher im Fels ada küsta wos s Wasser so ufatrucka sött und denn gits so wia Springbrünna. Leider häts do zwenig gwället, aso homer nix gsä. Nochana simmer no zumna Lüchtturm gloffa, rächt schöö gsä.
 
Blick Richtig Lanikaibeach  Ussicht vom Usichtspunkt Makapu'u
 
Denn homer nomol an Hike wella macha zumna Wasserfall, hond denn aber de leider ned gfunda und sind ewig lang im Wald ummagirrt. Zmol homer a Päärli gsä dur hüfttüfs Wasser laufa und hond üs scho gfreut sü chönid üs säga wo dura, aber hät sich denn usagstellt dass sü sich sowas vo verirrt hond ("We are so happy to see you!"). Irgendwenn homer a anders Päärli troffa und honds denn mit dena doch no zum Wasserfall gschafft. Wasserfall isch aber da falsch Usdruck, es isch meh a Rinnsal gsä mitma Gunta unna dra. Ziemlich enttüschend...

Da Mentig nomi hommer am Magic Island Beach verbrocht, da Zistig mit an Weekendtrip noch Kauai plana, am Obet da Pflichttermin im Mooses und am Mittwoch isch s bis jetzt best Highlight agstanda. Mür sind go SKYDIVA! Also Fallschirmspringa. Zersch hommer eppa 9 mol müsa underschriba, das üsi Aghäriga bimna allfällig Unfall mit Todesfolg ned gega dia Firma klagid, ... Scho chli struub :S Denn hets ghaissa Gstältli alegga, kurzi Instruktion und denn ab is Flügerli! Sind 4 gsä wo en Tandemsprung gmacht hond plus no 2 wo da andrna sin Sprung gfilmt hond. Womer doba gsä sind uf 3500 Meter (scho det hanis mega cool gfunda ofach dia Ussicht über s Meer und d Küsta) isches denn recht schnell ganga, ab ad Kanta und Hopps usa. I ha no nia so was Cools erlebt! 30 Sekunda freia Fall. Mer kas gär ned beschriba aber i weiss jetzt wieso da süchtig macht. Am Afang homr paar Saltos gmacht nochana hät de Typ denn da Schirm göffnet. Denn seiter so: Welcome to my office. I ha denn gfunda; "Nice view, i should talk to my boss, if i can get a office with a view like this!" (Roger, isch da a idee für en KVP? :p) Denn simmer no mit so paar Schrubana am Boda zua gfloga und denn leider viel z schnell glandet. As isch ofach so genial gsä! Weni mol vorig Gäld ha, weissi etz wa damit macha :)! I ha kei Videos und Fotis macha loh, well nu Fotana hettid scho 100 Dollar kostet, und a Video 150. Weli jo da etz "gsparrt" ha, chönnti mir jo dafür vilicht nomol en Sprung gönna ;)!? Oder falls eber gad d Spendierhosa aahet, you can sponsor my skydiving career :p! Mahalo (Danke)!
 


Etz no a anders Thema, und zwor Essa. Es isch so krass wia a grosses Agebot a Restis dases doh git. Im Ala Moana Shopping Center gits so en Foodcourt womer meistens go Zmittag essa gond. Isch so was wiana riesigi Kantina für maximal 2000 Lüüt. Ida Mitti häts ofach Stüal und Tisch und rundum on Essens"stand" am andera. Vo Panda Express über mexikanisch, italienisch, ... Aso egal uf wad Lust häsch, mer findets det! Und d Prisa sind recht human im Gegasatz zu sus überall. Vo demhär chönnti gad do bliiba, es wür scho eppa 3 Mönet goh, zum sich scho nu dur s Agebot vom Panda Express z fuattera :o
 
So da wärs gsä für da Moment. Mol loga wa i negster Ziit no so astoht (surfa?!). Ah übrigens ida Schual laufts guat, mer lernt ofach ned wirkli viel aber da liit vilicht o dra welli nu mit Schwizer ida Klass bi. Alli andra Klassa wärid chli durchmischt aber mini natürlich nöd... I probier so viel wia möglich z profitiera, aber i glob ned dasis nocher viel besser cha, usser vilicht hani chli weniger Hemmiga zum reda..

S' erst mol Schual, a neus Velo und en Hike

10Nov2016

Am Mentig hommer ida Schual üsa Iistufigstest ka. Mini Hoffnig isch nard gsä, dasi so schlecht bi dasi mit paar Asiata ida Klass bi, well ida höchera Stufa häts so guat wia nu Schwizer. Irgendwas isch glob aber bi dem Test falsch gloffa (oder i bi ofach super bim rötla :P), uf jedafall bini etz im Level 7 vo 11 da isch s C1 aso Advanced Niveau. Mol loga wia langi cha mitheba, well so guat isch mis Englisch definitiv nöd. Wami aber gfreut hät isch, dasi sicher immer am Morga Schual ha, o weni etz no 1 oder 2 Stufa ai kei. Uf jedafall simmer noch dem Test denn in Walmart go üs a Velo chofa. Tööri vorstella? D’Violetta:

En schöna 1-Gänger, 24 Zoll Rädli, bequema quistschenda Sattel, supercooli Rücktrittbremsi (so lang mer dratenkt dases Rücktrittbremsi hät isches cool, wemmer unfreiwillig an Schwarza analeit ehner weniger :P), hinna und vorna an Rückstrahler, richtig astrengend zum Fahra, ungfäderet, und vorna a Unwucht im Rad. Aso wa wett mer meh? Rosta fangis erst noch eppa 1 Monät ah ;). Mit da Violetta düsi etz amel dia chli meh as 3km  id Schual, so isch mer unabhängig vom Bus… Di ganz Aglegaheit isch aber nöd ganz ungföhrlich bi dem Grossstadtverkehr wo überhopt gär nöd für Velos usglait isch. Aber ko Angst mür passid uf!

Denn simmer dia  Wucha noch da Schual no uf an Hike (Hawaii Loa Ridge Trail). Hond a Uber gno und sind chli usserhalb vo Honolulu gfahra. Dött simmer denn eppa 2h ufen Berg ui gloffa. U mega cooli Ussicht underwägs, aber da Gipfel isch leider voll ida Wolka gsä. Aber hät sich doch glohnt. :)

Nochem Hike simmer hom und döt sind scho eppa 15 Lüt vomna andra Underkunft gsä, hond denn chli gessa und trunka und nochana simmer nochdem d Polizei cho isch, wäga Ruhestörig, mitenand is Mooses, well det d 1 Dollarnight gsä isch. Sind bis noch da 2 verhogget und da negst Tag ida Schual isch bitz astrengend wora :P. Dafür hommers am Nomitag gmüatlich ka und sind chli am Army Beach glega und hond bädelet…

Di ersta Iidrück

07Nov2016

D Flüg hond alli guat klappet, aber i bi u mega nervös gsä davor, waiss o nöd wieso. Woni uf Ghana ganga bi, bini wesentlich entspannter gsä, obwohli döt fast dopplet so lang wäg gsä bi. Do bini halt no jung und naiv gsä :P . Z San Francisco hani meh as 3h daziit ka zum umstiga, aber schlussendlich isches definitiv ned z viel Ziit gsä. D Passkontrolla hät fast 2h i Aspruch gno, wells ofach viel z wenig Schalter für viel z viel Lüüt ka hät. Z Honolulu acho, bini zersch mol chli ummagstüret, weli niamer gfunda ha wo mi abholt. Irgendwenn isch den d Cosy (ko Ahnig wiamers schribt) mitma Schild mit mim Namma ufmi zuacho. Läck hani mi gfreut! Zur Begrüassig hani sogär a Hawaiikettla übercho und da Jayson üsa Manager hät a Hawaiihemd a ka. Ha immer denkt da seg a Klischee aber s laufid do echt viel Lüüt mit dena Hemper umma. Nochana homer no uf d Julia gwartet, o a Schwizerin wo i di glich Schual goht und o i dera Student Residence wohnt. Denn honds üs id Unterkunft gfahra wo da Glen üs empfanga hät. D Unterkunft bestoht usma 2. Stöckiga Huus. Unna sind eppa 11 Zimmer für d Jungs und oba eppa nomol glich viel für d Mädels. Jeda hät a Zimmer mit Bett, Schrank, Klimaalag, Mikrowella, und Herdplatta. Uf jedem Stock häts 2 Klos und una verussa a Barbeque Area. Hond denn no a Rundi mitem Manager gredet, sind no go posta (wia gail isch denn da? en 24h Supermarkt, riesagross, direkt ums Eck!!) und am 2 simmer denn noch glob 30h wach (mit Usnahm vo dem Döösa wod immer ufwachsch bevor da Kopf uf Knüü kait im Flüger) go pfuusa. Am Sunntig homer Zmörgelet und sind denn z Fuass an Waikikibeach gloffa. Hond nöd badet sondern nu mol chli alles agloget. Isch kon bsundera Strand, obwohl s Wasser mega suber isch, aber i glob dä momer ofach gsä ha ;). Danoch simmer no det ana wo üsi Schual isch und det in Walmart. Da isch en riesiga Lada wo ALLES hät! Hond üs etz mol a Velo usgsuacht womer am Mentig noch da Schual wohrschinlich chofid. Nochana simmer wieder hom, spöter homer no Znacht gholt bimna Asiat und denn simmer o scho bald is Bett... Empfanga wora mitmana Hawaiikettla :) Waikikibeach, Honolulu 

3, 2, 1, ...

04Nov2016

D Ziit vergoht ofach wia im Flug. Etz isches Fritig Obet und i ha gad endlich fertig packt. Mol wieder uf di letst Minuta... Morn Morga tond mi d Mama, d Jeannine und vilicht no da Silvan an Flughafa. Am 10.15 sött da Flüger abheba via Frankfurt und San Francisco noch Honolulu. Bi recht nervös weli z Frankfurt ned mol 1h ha zum umstiiga, aber wird scho schief goh... am Obet am 10i Ortsziit sötti z Honolulu sii, denn wärs do ida Schwiz Morga am 9i.

So da nögst Itrag chunnt nochma offentlich entspannta Flug vo Hawaii :)

Auf dieser Seite werden lediglich die 10 neuesten Blogeinträge angezeigt. Ältere Einträge können über das Archiv auf der rechten Seite dieses Blogs aufgerufen werden.