Abreis

09Jan2019

Da Zistig isch o scho wieder Abreisetag gsä. Davor simmer nomol chli go ummatschumpla und nochana hät üs am Obet s Taxi an Flughafa brocht. Vo döt simmer uf Madrid gfloga, womer vom Nomi (01.01.2019) am 2 no meh als 7h hond müsa warta. Isch recht müasam lang gsä aber hond d Ziit denn mitma Fastfoodkettabsuach und UNO spiela ummibrocht. Nochmana numma ganz so langa Flug simmer am Obet spot z Züri glandet. Vo döt homer denn da Zug zrugg gno is Rhintel. Döt hond üs am Matthias sini Kollega abgholt und nochdems denn no s Wiahnachtsgschenkli vom Matthias (a Carrera-Bahn) fertig zemmagsetzt und usprobiert hond, simmer am Morga am 4i butz erledigt is Bett keit. Sind 4 mega schöni Wucha gsä J.

Kuba in Bilder

08Jan2019

Käfer Vinales Vinales Mural de la Prehistoria Trinidad Trinidad Gretteta Seestern :p Trinidad Trinidad Trinidad Vinales Vinales Tabakfelder in Vinales Trinidad Malecon

Kuba

07Jan2019

Noch üsera letsta Nacht z Mexiko simmer vom Taxi abgholt wora wo üs an Flughafa brocht hät. Döt hät üs ona abgfanga wo gfroget hät ebmer scho a Turistakarta für Kuba hond. Er hät üs dia denn usgfüllt und zeigt womer ana mond. Nocher simer no was go Essa, i en feina Burrito (woni ned sicher gsä bi eber minra Verdauig guat tuat) und da Matthias en Burger. Nochma kurza Flug mit chli döösa und am Usfülla vom Zollzettel hommer uf üsers Gepäck gwartet, und nochana simmer mitma Taxi zum Casa Particular voda Virgen gfahra. Si wohnt tutsch im Chuacha vo Havanna (Centro). Womer acho sind isch d Mariela, ihri Tochter scho usazspringa cho. Si hät sich denn o mega Ziit gno und üs alles zeigt. D Wohnig isch relativ chli gsä, en Ruum wo als Stuba, Chuchi und Esszimmer fungiert hät, üsers Zimmer und da Muatter sis Zimmer, und a chlises Bad mit Warmwasserduschi. D Mariela hät üs erklärt, dass mer ihra chond säga, womer as nögst wenn anafahra und übernachta. Si tuat Bekannta vo döt alüta und a Zimmer reserviera. Ana fahra kamer mit Viazul-Büs oder mit Taxi Collectivo. Dia Collectivos holid on bim Casa ab und fahrid om am andra Ort o wieder as Casa ana. Und mür zallt ofach en Pris, z. B. 20 CUC (=CHF) p. P. für da Wäg uf Vinales und dia Fahrer organisierid sich denn underanand, dass s Auto voll bringid. Findi no erstundlich wia da alles funktioniert ganz ohni Internet. Dia Collectivos sind zwor z. T. chli türer als dia grossa Viazul-Büs dafür hätmer eigentlich Null Ufwand. Wemmer mitem Bus uf Vinales (i verzicht uf s ~ ufem n wellis mitem Handy ned ana bring) hettid wella, hetemer mitem Taxi am Vortag ad Bushaltestell müsa (wo usserhalb vo Havanna lit), denn hoffa, dasses für da richtig Tag no Plätz hät, denn wieder mitem Taxi zrugg und am nögsta Tag wieder rechtzitig mitem Taxi usa. Und denn wäremer mind. Genau so tüür cho wia mitma so Collectivo. Uf jedafall hät d Mariela üs da und no einiges über Havanna verzellt, bevormer üs ufgmacht hond, mol a Rundi dur d Stadt go spaziera. I bi jo kon Autofan, aber do fahrid definitiv di schönsta Schlitta unma, woni je gsä ha :D. Eppa jedes 2. Auto isch entweder en megacoola amerikanischa Oldtimer oder ofach sus a uralti Büx (z. B. so ebbis Fiat 500 mässigs womer sich froget, wia sich da Auto mit 4 Insassa - falls sich dia Lüüt so chli falta chond - überhopt no mag bewega). Dia schöna Amerikanischa sind meistens Taxis und gsend echt guat us. Und o d Chäfer womer do siaht, sind im Gegasatz zu Mexiko meistens guat pflegt. I glob i moss no en Fotipost macha, mit dena Autofotana. Wemmer da nia selber gsä hät, kamer sichs glob gär nöd vorstella. Mer fühlt sich fast chli, wia 60 Johr zruggversetzt. D Gebäude vo Havanna gend no da Rest dazua. Kolonialbauta, di meista uumega abgfuckt aber z. B. z Habana Vieja (Altstadt) sind viel Gebäude restauriert und gsend wia usma alta Film us. I schweif glob chli ab, und zwor simer denn no chli umagloffa dur d Altstatt, d Strandpromenada (Malecon) entlang und döt simer denn ina Resti womer üs en Znacht mit Buffet für 10CUC gönnt hond. Nochdem mer denn üsi Underkunf schlussendlich doch no wieder gfunda hond (i schwör dia Strossa gsend ALLI GENAU GLICH us) simer bald scho wieder voda viela Iidrück butz müad is Bett keit.
Am Donnstig, 27. Dezember homer üs nochem Zmorga mit Fruchtsalot, Brot, Fruchtsaft und Tee womer im Casa gessa hond, ufgmacht zumna Stadtrundfahrt mit somena Hop On - Hop off Bus. I glaub da isch s 1. Mol woni so a Rundfahrt gmacht ha. Zerst simmer di eppa 2h Rundfahrt ofach mol gfahra und denn homer zerst mol müsa is Casa go Sunnacreme hola wellmersi am morga vergessa hond und i scho en liachta Sunnabrand ka ha. Denn hommer dia Rundi nomol gmacht und sind denn o dazwüschet mol usgstiga. Mir häts o glanget ofach nu z fahra und alles chli aloga. Danoch simmer go a Sandwich essa und denn homer no wella go Wasser posta, wa sich als rechta Spiisrutalauf usagstellt hät. So chlini Lebensmittellädeli wiamers vo Mexiko kennt hät gits do nard Null. Irgendwo hommer denn a "iichofszentrum" gfunda. Da Matthias hät dussa gwartet, weller mitem Rucksack nöd ina hät töra und i ha denkt da goht jo nu 2 Minuta. Nicht so in Kuba. Zerst hani mi fälschlicherwiis entschieda zum mol en Stock ufa goh, döt häts aber nu Wöschmaschina und so ka, denn bini nomol 2 Stöck ui und ha nünt gfunda, drumm bini wieder is EG. Guat nögsti Richtig, en Stock aba. Gesagt getan und siehe da, en Lada. I voll euphorisch ina und denn so: hmmm okay. En grossa Lada mit grossa, läära Gstell. Es hät usgsä, wia wenn alli Lüüt davor Hamsterkäuf gmacht hettid. S Agebot isch wohrsch. us insgesamt eppa 20 Artikel bestanda. I mol überall ummagirrt bis mi en Schwarza agsprocha höt: Agua? I so: Si, agua. Denn häter mer zeigt wos Wasser isch. Es hät genau 1 Sorta ka. Wasser im 0.5 Literfläschli. Hamer 2 geschnappt und wella zuda Kassa. De Typ hät mi denn di ganz Ziit um Geld aabättlet und isch mer nohgloffa. Ha denn eppa 20 mol gseit "No" und denn häter ufgeh (bi halt zimlich getrainiert bim Lüüt abwimmla siiti z Ghana gsä bi). Ada Kassa, a riiiesa Schlanga. U viel Lüüt und di meista davo hond genau Öl und uftauti ehemols iigfrohrni Puletschenkel kooft. Mega speziell gsä. Ha denn am nögsta Morga d Mariela gfroget wa do los isch und si hät üs erklärt, dass immerno extrem wenig Sacha / Mengana importiert wära törid (da hommer nard scho gwisst ka, aber ned denkt dasses soo krass isch). Da Staat weli d Produktion im eigna Land fördera, s Problem isch nu, dasses jo ofach viel Sacha giit, wo z Kuba im Moment halt ofach nöd produziert wärid. Letsti heggids mega Problem ka mit Mehl und denn hegs ofach ko Brot geh. Frücht kemmer ufem Markt nard guat über aber z. B. Fisch segi o problematisch. I ha denn gfroget wieso, well Kuba isch jo a Insla. Si hät denn gmont, dass de meist Fisch gad ad Restis voda Hotel goht und so für d Bevölkerig fast nünt meh vorig bliibt. I find da mega krass. Da chas jo nöd sii, dass da Züüg wos scho selber produzierid denn no d Usländer (zell üs o drunder) essid. Als Touri im Hotelkomplex kunnt mer da ganze jo gär nöd mit über, döt wird nard alles abota. Aber für di Iiheimischa schints würklich prekär z sii. Sü vermögid o da ganz Züüg nöd. Es wird do mit 2 Underschiedlicha Währiga zallt, CUP (Iiheimischi) und CUC (Touris). Wia da ganz funktioniert verstandi no nöd ganz,aber als Touri bliibt mer nard eh immer ufem "Touripfad" wo alles mit CUC, Euro oder Dollar zallt wera chöni. Uf jedafall bini denn noch eppa amanna Halbstund mit mina 2 Wasserfläscha, zimlich schockiert vo mim Iichoofserlebnis zum Matthias zrugg cho, wo scho gmont hät i seg mitma Kubanischa Chico durabrennt oder i fändi da Usgang numma. Happy über üseri Wiedervereinigung (wia romantisch :p) simmer denn am Plaza Vieja no go an übertüüreta Mojito und a Bier trinka bevormer zrugg is Casa sind. Döt homer nochma erholsama Nacht wieder Zmorga gessa und sind denn vom Collectivo (i dem Fall e 9 Plätzerbüssli) abgholt wora. Noch eppa 3h Fahrt simer z Vinales acho. Döt hätter üs direkt bim Casa usaloh und a alti Frau hät üs denn s Zimmer zeigt. Chli spöter isch den d Heidi cho, wo bitz Englisch redet und hät üs im Buach ufschriba, wo dia Casas alli Bsuacher mond festhalta. Danoch simer go s Städtli erkunda. Es isch nöd sehr gross aber i finds mega cool. D Hüüser sind meistens 1 Stöckig, farbig agmolet und mitma Veranda vorna usa wo so guat wia immer 2 Schaukelstüahl stond. I glob meh als d Hälfti vo dena Hüüser bütid Zimmer ah. Z. T. Gsiahtmer a 8 Hüüser nochenand da Zeicha für Casa Particular. I glob do momer echt NIA Angst ha, ko Zimmer z finda. Nochda ersta Erkundigstour mitem Bsuach vomna Markt hommer üs ebbis z Essa gönnt. Danoch simer schnell zum Casa womer s dasmol relativ unkompliziert kaufte Wasser abglada hond und s z'Mexiko kaufte Hello Kitty and Friends UNO ipackt hond. Nochana simer zumna Park womer Paar Rundena UNO gspielt hond. I da Städt do gits jo relativ wenig Wlan, drum hät jedi Stadt mind. 1 "Wlan-Park". Döt kamer sich so a Karta chofa 

und mit dera hätmer denn a begrenzti Ziit lang Wlan. Honds bis etz no nöd gnutzt, aber mer ka druff goh, dass wenn imna Park alli Lüüt am Handy hoggid, isches da Wlan-Park. Noch nomol was z Essa simmer müad zrugg is Casa. Am nögsta Tag hommer uswärts zmorga gessa und denn hät üs en Guide abgholt für a 3h Tour z Fuass. Mer sind eppa a 3/4h is Palmorito-Tal gloffa und dött hät üs da Alejandro verzellt wias Kafibohna schellid, röstid und malid und dass de Rum vo dem Teil vo Kuba (Pinar del Rio) nöd wia sus us Zuckerrohr sondern us Guavas (a Frucht) hergstellt wird. Danoch simmer no ina so a Hütta wo rundum d Wänd und Decki us Palmweder isch. I dertiga Hüttana werid d Tabakblätter tröchnet bevors zu Zigarra verarbeitet wärid. Wiamer davor scho erfahra hond, mond d Tabakbuura 90% voda Ernti ad Regierig abgeh und di restlicha 10% törids selber verarbeita. De Maa döta hät denn o no erklärt wa da Underschied voda vo ihna hergestellta und voda Regierig hergstellta Zigarra isch und dass ihri ganz ohni Chemikalia hergstellt werid und z. B. zum s Endi aachleba selber hergstellta Honig verwendet wird und bi dena voda Regierig halt Chläber. Usserdem tonds bi ihna sina da mittler Strang vom Blatt wo 70% vom Nikotin dinna isch, vorem Rolla usatrenna, und denn d Blätter als ganzes Rolla. Dia voda Regierig werid di ganza gschnätzlet inkl. Innerem Strand und denn ofach i ganzi Blätter iigwicklet. Isch recht interessant gsä, und weller gmont hät wemmer ned Rum trunka (wamer davor bim Alejandro hond), Zigarra graucht und Salsa tanzet heg (uf da verzichtemer glob besser bi mina Tanzkünst), segmer ned richtig z Kuba gsä, hommer denn o no oni probiert. Danoch simer wieder dur dia Hügel gloffa bis mer zrugg z Vinales gsä sind. Danoch homer gefühlti 5h UNO gspielt im Wlan-Park. Sü sind döt ebbis am ufbaua gsä, a Bühni mit Stüahl und so und hond nard denkt, vl. Findemer irgendwenn no usa wa da isch, aber honds bis am schluss nöd checket. Nochem Znacht homer no os trunka bevormer is Bett sind. Da nögst Tag isch underem Motto spaziera aka wandera gstanda (17km hommer gmacht). Zerst simmer eppa a Stund lang us da Stadt usa zum Restaurant Balcon de Valle gloffa. Da isch so liacht erhöht und mer hät a mega geniali Ussicht. Well mer chli noch am 9i scho döt gsä sind, simer di ersta Gäst gsä und hond d Ruah chönna gnüssa. D Umgebig do isch mega speziell. Überall häts so Hügel us Kalkstei und dazwüschet rostroti Fälder wo Tabak abbaut wird. Usserdem häts Bananastuda, Avocadobäum, Maisfelder und Bohnafelder. D Felder wärid do immerno nöd maschinell bewirtschaftet und drumm gsiahtma o all wieder Manna mit Pflüag wo vo 2 Ochsa zoga wärid. Mer cha sich da kum vorstella, ida hüütiga Ziit. Es git do o no u viel Rösser wo Kutschana (meistens mit 2 Rädli und ma Bänkli oba druff) züchid. Zrugg zuda Landschaft. Dia Kalkstoofelsa sind vo zunderst bis zoberst bewachsa mit Bömm und Palmana und es gsiaht ofach mega genial us. Nochem Zmorga i dem schöna Resti, simer zum Hotel Los Jazmines wos di schönnst Ussicht söll ha gloffa. Döt isches aber völlig überfüllt mit Touris gsä, well do dia Touribüss aahaltid. Mür hoond üs denn entschieda zum d Vinales-Bustour z machs. Da isch so en Hop on / off Bus wia z Havanna ofach nöd en Doppelstöcker. Mit dem Bus simmer denn a paar Stationa gfahra und döt usgstiga. Wells aber ned interessant usgsä hät, simmer denn 1 Station wiiter (4km) gloffa. Döt hät so a riesigs Bild ada Felswand (Mural de la Prehistorica). 19 Moler hegid 4 Johr lang dra gschaffet und es zeigt so Dinosaurier, Schnecka, Menscha und paar undefinierbari Sacha. Döt homer denn no a halbstund uf de Bus gwartet bevormer damit zuda Indianerhöhli gfahra sind. Da isch ofach a Höhli im Fels. Di ersta paar Meter hätma chönna laufa, nochana ischmer no ina Böötli gstiga und di letsta 400m oder so gfahra. Da Bootsfüahrer hät denn o no erklärt wamer so i dena Felsa ka gsä, en Fisch, Schlangena, en Totakopf,... Nocher homer üs nomol 1/2h mit UNO vertriba, bevormer mitem Bus wieder döt ana gfahra sind womer am Morga iigstiga sind. Vo döt homer üs denn uf da Homwäg gmacht. Mitem Matthias sim Maps Me hätmer da Wäg nard ganz guat gfunda. Irgendwo im Nirgendwo isch denn so en alta Farmer vorma so Tabaktröchnigshüüsli gstanda und hät üs uf spanisch aquatscht. Denn hani gset dasmer nöd spanisch redid. Denn häter gmont: You speak englisch? Mür so: Yes. Er so: Where are you from? Mür: Switzerland, Suiza. Und er voller Freud: Also sprecht ihr deutsch? Und mür so mit grossna Auga, sü sind üs fast usakeit: Ja, Sie auch? Denn hätter sich vorgstellt als Leonardo Da Vinci, der 2. Hätter denn no mitmana Lacha agfüagt und verzellt dasser vom 84-88 z Leipzig gwohnt hät und nochana zrugg uf Kuba cho isch, und denn als Maschinabauer gschaffet hät. Well etz aber sin Vater z alt isch für d Arbeit als Farmer hegi er etz d Felder müsa überneh, wells en Familiebetrieb seg. Er isch mega sympatisch und ufgstellt gsä und hät üs gfroget ebmer da Lonely Planet (Reisefüahrer) kennid, und denn häter a älteri Usgob us da Hütta gholt und üs voller Stolz zeiget, dass er döt dinna isch ufma Foti. Well mer d Tabak Herstellig am Vortag scho gsä ka hond, homer üs denn bedankt und verabschiedet und er hät üs no da Wäg erklärt. Mür sind bedi immerno kli platt gsä, dass en Buur im hindersta Egga dütsch redt. Noch da letsta paar Kilometer simer denn erledigt wieder im Städtli acho. Döt simer denn no inan lada wellmer üs Wasser und Keks hond wella chofa, aber Wasser häts irgendwia nöd geh und s Sortiment isch o wieder nu us gfühlta 20 Artikel bestanda. Nochma schnella Duschi (mini Bei sind voll root gsä vo dem Dreck) simmer is El Olivo go Znacht essa. I hamer Spaghetti Carbonara und da Matthias sich Lasagne gönnt. Isch echt guat gsä. Denn simmer scho vorem 7i zrugg is Casa womer no packt hond, Blog gschriba und Sudoku gspielt. Isch en mega schöna aber o recht astrengenda Tag gsä. 

Am. 31. Dezember häts gheisa mer wärid am 8i vom Collectivo abgholt. Am viertelund ischer uftaucht und am 9i homer denn fang d Stadt verloh. Es isch e Büssli gsä mit Platz für 15 Lüüt plus Fahrer und schlussendlich simmer 13 Gäst gsä plus Gepäck. Aso isches recht volla wora. Sind denn so uf Havanna gfahra. 6 Tütschi, 1 vo Los Angeles, 2 New Yorker und 2 vo Chile wobi di eint halb Tütschi, halb Tschechin gsä isch. Am Afang hond alli kli plauderet irgendwenn sind alli halb am schlofa gsä, wa aber nöd so ring isch wenn d Sitzbank ko Nackastütza hät. De Fahrer hät voller Stolz verzellt, dass de Bus 70i gsä isch, entsprechend hätter o usgsä und tönt. Noch eppa 3-4h Fahrt homer aghalta und denn hät s grosse Umbiiga agfanga. Dia wo uf Trinidad hond wella, so wia müür sind inen Bus mit 38 Plätz ghöggt wora. Mit dem homer denn di restlich Strecki mit onera Pausa hinderüs brocht. Kurz vorem 5i simmer uf Trinidad ina gfahra. Denn hät dä wo da alles kli koordiniert bi allna da Zettel mit da Adressa vom Casa igsammlet und anschinend d Sitznummer drufgschriba und denn simmer mit dem grossa Bus dur di enga Strössli vo Trinidad zirklet. Wemmer bimna Adressa acho isch, hätter d Sitz zellt und drumm gwisst vo wemer da Zettel ka hät, mit gestikuliera häter gfroget ebmer en Rucksack hät und wo de isch, im Bus oba inna oder unna, denn honds da usagsuacht und da eint isch denn mit om zum Casa gloffa, hät döt da Namma vom Inhaber gschraua und wenn de d Tüür ufgmacht hät, isch da Bus witergfahra zum nögsta Casa go di nögsta uslada. Es hät nard alles wia am Schnürli klappet und für da dassmer 3CUC meh zallt als im Viazul Bus isches voll okay wellmer vorda Hustüür abgholt und am neua Ort wieder bis zuda Türa brocht wird. Üsi Gastgeberin z Trinidad heisst wia dia scho z Havanna Mariela. Si hät definitiv sehr viel kubanischs Temperament und underrichti ada Universität ebbis mit Kultur und Sprocha. Hond denn üsers Zimmer bezoga (inkl. eigenem Bad und Dachterassa) und denn homer duschet und üs grichtet zum go essa. Ufma Dachterassa homer ebbis kubanischs gessa. Da Matthias Fisch und i Lamm. Danoch simmer no i 2 anderi Restis go ebbis trinka und d Auga sind üs am 10i scho fast zuakeit. Vorem 12i simmer zrugg is Casa, döt homer üs Ziit vertriba bises Mitternacht gsä isch und denn simmer nochem "a guats neus johr" butz erledigt is Bett keit. Am nögsta Morga homer im Casa en klina Zmorga gessa. D Mariela hät üs Frücht und Brot und Fruchtsaft grichtet ka. Nocher simmer loszoga zumna Velovermietig und hond sogär Velo verwütscht inkl. verschiedana Gäng und sü sind für d Verhältnis do echt guat gsä. Mit dena simmer denn an Strand zwüschet La Bota und Playa Ancon gfahra. Döt hommer chli am Schatta chillt (i ha d Sunnacreme dahom vergessa und mi no nöd fertig icremt ka, aso isch e Krebsgsicht vorprogrammiert gsä), denn bini no chli go schnorchla, hät sogär Koralla und Fischli ka und nochana simer no wiitergfahra meh richtig Playa Ancon. Döt häts üs aber ned so gfalla und drumm simmer denn wieder a Stuck zrugg. Hond üsers Glück denn amna menschalosa Strand versuacht aber s hät leider ko schattaspendendi Bäum ka. Dafür homer no amna Seestärn s Leba gredet. Sind kli am Strand noh gloffa und hond Usschau ghalta noch schöna Muschla oder sus was interessantem und da Matthias hät denn zmol uf da Stöö nebet em Wasser en Seestern gsä. Muatig wiani bi hanen denn vorem vertröchna grettet i dem i en is Wasser ghöggt ha (viellicht hät er absichtlich im trochna chillt aber er hät üs nöd wella säga ebsem döt gfalli oder er liaber zrugg is Meer wett). Noch dera heroischa Aktion ischer loos gschwebt, is tüüfer Wasser, do simmer denn überzoga gsä, dasser no läbt und sind richtic stolz druff gsä, sägs z chönna mür hegid amna Seestern s Läba grettet. :p Noch dera guata Tat (etz homer dia für da Johr scho am 01. Januar erledigt) simmer ina Resti go essa und danoch no anen andera Strand glega und hond chli glessa und sind chli gsä. Am 5i homer üs uf gmacht dia paar Kilometer zrugg uf Trinidad. Völlig verschwitzt homer s Velo zrugg geh. Spöter simer no go Znacht essa ina Resti wo sogär gratis Wlan ka hät. Da homer do nard no nia gsä. D Klima isch aber uf Antarktischi -40 Grad igstellt gsä und drum simer direkt nochem Essa wieder ganga. Am nögsta Tag simmer am 9i nochem Zmorga vomna Guide abgholt wora zumna Usflug ufamna Ross. Am Matthias sis bruu Ross isch vom Schlag "weni etz Vollgas gib, chani nochana Frässa bis di andra chomid" gsä und mis wiis isch meh so gsä "weni huara langsam lauf, musi gär nünt essa weli ko Kaloria verbrenn". Da heisst da Matthias isch immer im Trab vorus und denn häts Ross gfrässa bis i mit mim im Schritt acho bi. Ha mengmol ächt Angst ka, mis vertschloft mer wäred em laufa. Etz hani endlich o mol min winziga Spanischwortschatz wo sich nöd um Essenswörter handlet chönna brucha. Derecha, izquierda und todo recto. Rechts, links und grad us. S Ross hät eigentlich recht guat uf links und rechts reagiert wemmer d Zügel i eni Richtig ghebet hät, aber wieso dasses immer zwüschet Schritt und Trab abgwächslet hät, hani bis am Schluss nöd verstanda. Irgendwen simmer denn imna Resti acho womer en Zuckerrohrsaft trunka hond und denn simer wiiter zumna Wasserfall. Döt häts aber mega viel Lüüt ka, drumm homer denn ufs Bada verzichtet. Danoch ischmer zrugg zum Resti womer völlig übertüüret gessa hond. Nochana ischmer da ganz Wäg zrugg gritta, döt simmer denn no mitma andera Päärli zemma gsä wo er vo Tütschland cho isch, aber etz mit sinra Japanischa Ehefrau z Japan wohnt. Underwägs sind mim Ross no d Vorderbei wäg grutscht und s hätses denn uf da Latz, i bi abgumpet und isch denn issert amana fätta Bläuala nünt passiert. Noch 4.5h simer zrugg im Städtli gsä, verschwitzt und mit ghörig Füdlaweh. De Spruch "Das Glück dieser Erde, liegt auf dem  Rücken der Pferd" kani etz nöd würklich nochvollzücha. Isch aber glich ganz lustig gsä. Nochma Rundi ufem Markt simmer denn go Znacht essa. I da Restis do und o scho z Mexuko häts viel Livemusig. Z Mexiko sinds meistens ofach 2 Manna mit Gitarra wo i onra luutstärchi singid. A dem Obet z Kuba hät a 5-köpfigi Band Liader wia "Despacito" und "Nossa" zum Besta geh. Isch ächt cooli Stimmig gsä. Noch üsera Pizza und amana Bier simer bald go schlofa, wa aber bi gfühlta 50 Grad nöd so erholsam gsä isch. Hond zwor a AC ka aber dia hät Lärm wia 2 startendi Düsajets gmacht. Am letsta Tag homer nard wella mitem Touribus dia Rundi macha, wellmer denn aber nöd usagfunda hond wo de Bus durafahrt und haltet, homer schlussendlich a Taxi gno an Playa Ancon. Bis etz simmer nard di ganza Ferii no nia Taxi gfahra usser vo und an Flughafa, meistens tschumplid mer aber dia Strecki wär chli wiit gsä. Am Strand hommer denn meh ider weniger da ganz Tag gammlet, chli Schlof nohgholt, glesa und UNO gspielt. Irgendwenn isch no so en Tyo mit klina Pizza verbii gloffa, denn homer halt wieder Pizza gässa. Nochana simmer zrugg zuda Taxis und ona hät üs denn agsprocha ebmer id Stadt zrugg welid. Hond denn gsait jo und i ha gfroget welles sis Taxi isch. Er hät ina Richtig zeiget, wo luuter gääli normali Taxis gstanda sind und 1 chlini lotterigi Büx, wo wohl en chlina Fiat isch. Nöd so ona voda herziga alta 500 sondern eppa glich chli aber eckig. Denn mür so denkt jo so a gääls passt scho und tadaaa, natürlich hät ihm dia verbüület, winzig Fiatbüx köört. Dia meista lüüt hettid glob nöd so Fröd ka, dass de verwütscht hond, aber mür hond üs gfreut wia zwo chlini Goofa. Z 4ta wärs definitiv recht eng wora und für Gepäck hets o ko Platz meh ka. Zum Znacht simmer go kubanisch essa, "ropa vieja" so shreddet pork und danoch homer no packt und dur da dass mer di ganz Nacht d Türa uf d Dachterassa offa loh hond, isches zum Glück ganz agnehm gsä. Am nögsta Morga nochem Zmorga ubd ma Rundi Smalltalk mit da Mariela isch üs s Taxi Collectivo go hola cho, und tadaaaa dass mol isches en richtig alta amerikanischa Schlitta gsä. Hond üs denn mitem Fahrer uf d Vorderbank quetscht und sind di andra 3 

Lüüt go abhola. Dia hond aber anschinend irgendwia no am Zmorga chillt und drumm simmer denn schlussendlich meh as a Stund spöter losgfahra uf Santa Clara. Dia Stadt isch historisch bedütend well do da Che Guevara bida Revolution en Zug entgleisa loh hät. Döta acho homer s Zimmer no um 5CUC abaghandlet, bezoga und sind denn loszoga go Zmittag essa. Danoch simmer chli dur d Stadt gschlenderet und no bi dem Zugentgleisigsdenkmol verbii wo aber scho gschlossa gsä isch. Nochana simmer irgendwenn go Znacht essa. Döt homer gsä wieso dia Lüüt do s Essa vermögid. Uf da CUC Karta wo für Touris isch, hät s Sandwich 3.00 CUC (=Franka) kostet, uf da CUP Karta (währig für Iiheimischi) häts nu 15 CUP kostet = knapp 0.5 CUC/Franka. Es isch amel echt Verwirrend, eb dia Priisa etz CUP oder CUC sind.
Nochana simer bald hom und go pfuusa. Am nögsta Tag homer so richtig schö usgschlofa und denn simmer zum Che Guevara Museum. S hät döt a riesigi Statua vonem und unna inna so a Museum mit Gegaständ wo vo ihm gsä sind. Imna andra Ruum isch so a Gedenkstätta mit sim Grab und dem vo glob 17 wiitera wo bida Bolivianischa Revolution gstorba sind. Nochdem mer da agloget hond simmer zum  Boulevard go essa und denn zum Zoo gloffa. Underwägs hät üs en Maa mit Guten Tag grüasst und denn homer agfanga mitem Reda und de hät anschinend o mol 4 Johr z Tütschland gwohnt. D DDR und Kuba hegid do sympathisiert und drum hegid viel Lubaner chönna noch Dütschland goh. Im Zoo womer denn gsä sind wärid Tier definitiv nöd guat ghalta aber da homer vorana scho denkt. D Frog isch, goht mer gschider nöd, damit dia Zöö zua tond, oder gohtmer damits Geld hond zum da Tier ebbis guats to, wobii i imna sotiga Land glob nia meh inen Zoo gang. D Leua hond eppa 6x6m Platz ka und alles uf Beton. Sind omol rundum gloffa, bevor mer mitma Pferdekutscha zrugg Richtig Parque Vidal sind. Döt simer no inen Zigarralada wo sich da Matthias no paar Zigarra kooft hät. Danoch hommer im Park paar Rundana UNO gspielt (dia Aaschaffig im Walmart z Cancun hät sich definitiv glohnt). Und denn simmer no go Wasser posta. So viel verschiedeni Läda mit allem möglicha homer sus no niana gsä, und sogär s Wasser homer schnell gfunda und isch nöd mol halb so tüür gsä wia z Trinidad. Danoch homer no en Versuach gmacht bim Internetlada, wo dia Wifi Kartana verchoft. Endlich sind mol nu eppa 6 Lüüt agstanda, womer noch 10 Minuta chli witer vorna gsä sind, homer gsä dassmer dinna nomol ewigs mos "aahogga" drumm homers denn sii loh. I bi mi jo vo Ghana scho gwöhnt dass alles chli länger goht, aber do goht alles no viel länger. Vorallem s astoh i Läda, echt unglaublich. Liablingshobby voda Kubaner: Schlanga stoh. Nochem Znacht hommer chli packet und glesa und am nögsta Morga am halbi 9i hät üs s Taxi abgholt. Dassmol isches definitiv a Taxi gsä und zwor a stinknormals. Noch knapp 3h simmer z Havanna acho. Etz simmer imna Casa eppa 30 Meter nebet dem vom Aafang. Es isch nard a chlini Wohnig mit 2 Schlofzimmer wo nu für d Gäst isch. D Vermieterin wohnt oba imana seperata Wohnig. Mer sind denn o ziemli bald looszoga go essa suacha. Debii simmer denn imna schäbiga Resti mit horrenda Getränkepriisa glandet (wamer erst nochem Essa erfahra hond, wia viel dass s Trinka isch hani davor vergessa zum froga), well üs en Typ agaprocha hät wo verzellt hät dass sini Schwöster en Schwizer ghürotet hät und zu ihm id Schwiz zoga isch. Er isch etz aber im Gfängnis weller a Hanfplantaga betrieba hät. Noch dera Abzocki simer am Boulevard zwüschet Habana Vieja und Centro entlanggschleuderet und denn homer no a Rundi UNO gspiekt, ida Zwüschaziit isch am Matthias sis Käppli und d Sunnabrilla klaut wora. De Halbtag isch also bitz unnötig gsä. Nochana homer üs denn imna Park so Wifikarta kooft zum üsi "Soziala Kontäkt pflega" und luaga eb da Rückflug no gänderet hät oder nöd. Nochma Znacht homer no a Bierli kooft womer denn bi üs im Innahof währed amna UNO Spiel trunka hond. Am Mentigmorga homer uspfuuset und danoch homer amna Imbiss a Sandwich gholt. Denn homer mit da Fähra wella über da Hafa zumna Christusstatua, wellmer denn di falsch Fähra gno hond, simmer am falscha Ort glandet. Döt hät niamer Englisch gredet, aber hond denn nochana checkt dass di negst zrugg uf Havanna und denn zu dera Statua goht. Honds denn o no det ana gachafft. Dia Statua isch kli wiiter oba, isch a huara Wärmi gsä zum det ui laufa. So gross wia ihres Vorbild z Rio isch si glob nöd, aber isch glich no bedruckend gsä. Noch dem mer üs imna Park usgruabet hond, simmer wieder mit da Fähra zrugg und go en verspöteta Zmittag essa.

No meh Bilder vo Mexiko!

25Dez2018

Laguna Bacalar Laguna Bacalar Laguna Bacalar Kolonialstadt Valladolid Käfer z Valladolid Ruinen Ek Balam HolboxHolboxHolboxSeestern auf HolboxDa Matthias mit da grössta MuschlaDi schönst MuschlaHolboxUf da Bootstour ufda Laguna BacalarBida Ruina Ek BalamSunnauntergang z Holbox

Laguna Bacalar, Valladolid & Holbox

25Dez2018

Am 18. Dezember hommer üs dia 2 Velos gschnappet, wommer gratis hät chönna uslehna bim Hostel und sind damit zuda Cenote Azul gfahra. Well si erst am 10i ufgmacht hät, hommer no a 3/4h vorem verschlossna Tor müsa warta. Womer denn ina hond chönna, simmer chli enttüscht gsä. S isch nard ofach en kreisrunda See. Anahogga oder ligga hätmer o niana so recht chönna, drumm homer üs recht bald entschieda zum zruggfahra. Ufem Homwäg homer no en Abstecher gmacht zuda ADO-Busstation womer da Bus für uf Valladolid reserviert hond. Nochana homer d Velos zruggbrocht und sind z Fuass durs Städtli gschlenderet. Mür mond sega, s Dörfli hät doch no recht Charme, wamer bi üsera Aakunft nöd denkt hond. Di ganz Stadt isch volla mit mega schöna Street Art, Bilder wo a Muura und Huuswänd gmolet sind. Diversi Stilrichtiga & di meista mega schöö. Uf üsem Spaziergang homer denn a Resti mit vielna Iiheimischa entdeckt, und hond üs denn döt ebbis Zmittag bstellt. Meistens homer ko Ahnig, wamer nard bstellid, aber irgendwia homer s Gfühl egal wad bstellsch, es sind immer Tortillas (di runda Fladabrot womer amel für Fajitas nemmid, ofach i chlii) mit underschiedlicher Fülliga. Aber lond üs amel überrascha. I dem kliina Iiheimischa Restaurant isches so guat gsä, dassmer sogär no a 2. Mol döt hära sind, wamer sus nard z vermiida probierid. Nochem Zmittag simmer denn inen öffentlicha Park wo direkt am See liit, hond döt chli glesa und badet und s schöö Wätter gnossa. Wos chüal wora isch simmer zrugg is Hostel womer denn no feini Pizza zum Znacht gessa hond. Am negsta Tag homer chli usgschofa und denn simmer zum Casa Lahar Hostel gloffa womer amna Strossastrand no gessa hond. Vom Casa Lahar isch üsi buacht Bootstour über d Laguna Bacalar losganga. Sind a zemmagwürfleti Gruppa vo Australier, Amerikaner, Tütscha und üs gsä, sowia üsi 2 Käpitännina. Zerst häts gad mol a Bier geh und denn isches los ganga. Es isch echt unglaublich, wa de See für verschiedeni Blau hät und so blaus Blau hani no nia gsä ka. Weni d Fotana alog, hani s Gfühl uf jedem Bild isches wieder a anders intensivs Blau. I hami gad chli i de See verliebt. Uf jeda Fall isch da 1. Stopp denn am Canal de los Pirates oder so gsä. En Kanal wo als einzigi Verbindig zwüschet em Meer und da Laguna existiert. Döt homer denn i hüfttüüfa Wasser chli ummaplanscht bevors wiiter ganga isch zuda Cenote Negro. Dia isch eigentlich ofach ein Teil vom See aber mer siaht recht guat, wo sii afangt. Rundumm isch da See eppa 2m tüüf, dia Cenote isch aber wianen grossa Zylinder und i dem inna isch da tüüfst Punkt 180m underem Wasserspiegel. Drumm da Namma, isch ofach a schwarzes Loch. Nochdem mer denn döt no chli badet hond, häts Zvieri geh. D Kapitäninna hond a chlisses Früchtebüffet ufbaua und Toast mit Nutella und Banana häts o geh. Und natürlich o Bier und Tequila Sunrise. Nochana homer no d Cenota Esmeralda und Cocalita agstüüret und tum Schluss no d Vogelinsla. Wa für Vögel dass döt lebid, hani nöd verstanda, aber dia chemid nard erst im Januar zrugg. Hond denn aber glich no zwo drü gsä wo über üs duragfloga sind. Sind recht gross und recht rosarot gsä. Bi dera Vogelinsla hommer denn nomol badet und denn isches o scho fast 4i gsä und mer sind zrugg zum Usgangspunkt gfahra. Nochana simer nomol chli in Park gläga und zum Znacht simmer denn eba nomol i da Resti womer am Vortag scho gsä sind. Danoch homer im Hostel packt und sind früah is Bett. Am Donnstig homer früah am Morga da Bus uf Valladolid gno. Nochma wiedermol zu klimatisierta Fahrt simmer noch knapp 4h acho. Valladolid liit imna andra Ziitzona und drum simmer etz 7h hinder da Schwiiz. Nochdem mer acho sind, und im Hotel icheckt hond, simmer mit gmieteta Velos zrugg id Innastadt. Es hät do mega viel Gebäude us da Kolonialziit, wani mega cool find. So stelli mer nard ehner Kuba vor als Mexiko, aber i finds echt schöö zum aloga, dia Gebäude mit hoocha Rüüm und ussa alli anderstfarbig gstricha. Usserdem fahrid do no meh VW Käfer umma als mer sus scho gsä hond. Wäred mer zmittag gessa hond, häts no en rechta Platzrega geh, da erst Rega siitmer doo sind. Nochem Zmittag simer no ina Cenota wo zmittst ida Stadt liit. Ofach en See wo wieder eppa 10m under da Erda liit und geg oba offa isch. Zum Znacht simmer imna feina Resti gsä. Am Fritig morga homer üs früah ufgmacht zuda Mayaruina vo Ek Balam. Hond a Taxi Colectivo gnoh (a Taxi wo erst abfahrt wenn 4 Lüüt wo as glich Ort wend, dinna hoggid) und sind det ana gfahra. Ek Balam isch im Verglich zu Chichen Itza, da wohl bekanntischta Mayaruina vo Mexiko, relativ chlii und dafür o nöd so überloffa. Zumindest womer acho sind, häts no fast ko Lüüt ka. Hond denn dia Ruina chli erkundet und do tör mer o no ufs ufastiiga, wamer denn natürlich bida grössta o gmacht hond. Isch scho no hooch gsä und mer hät en geniala Uusblick uf da Wald ringsum ka. Aber i glob wemmer z Kambodscha Tempel agloget hät, ischmer vo so Ruina nöd so schnell z beiidrucka. Bida Tempel z. B. z Angkor Wat, isch jeda Stoo no mit Bildhauereia verziert, wa do nöd da Fall isch. Nocher simer no a Cenota go aloga wo 1.5km vo da Ruina entfernt isch. Da Matthias isch no inagumpet, da Gfröörli Sarah hät zuagloget. Nochma Zmittag im Resti döta simmer dia 1.5km wieder zrugg glofa zuda Ruina, döt homer kli gwartet bis a Shared Taxi cho isch, da Taxifahrer hät üs wella abzocka aber sind denn schlussendlich für da glich Priis zrugg gfahra wia hera. Verhandla wemmer nöd spanisch cha isch no chli müasam, aber s ander Päärli wo mit üs gfahra isch, hätem uf Spanisch da verzellt wo i scho uf Englisch ha wella und denn häts zmol klappet. Zum Znacht simer ina Resti wo da Matthias sich a Pizza gönnt hät, mitem Kommentar: So weissi immerhin wani überchum. Dem isch aber denn nöd so gsä, uf mina Enchiladas isch Salot gsä mit baarem Rahm als Sauca und da Belag vom Matthias sinra Pizza het locker für 4 glanget und guat segsi o nöd gsä. Drumm homer schnäll en Abflug gmacht. Am nögsta Tag simmer früah uf und hond üs en Zmorga gönnt amna so Platz wos mehreri Ständ ka hät und ida Mitti Tisch zum ana hogga. Isch recht amüsant gsä zum dena Kellner zualoga wias um Kunda kämpft hond. Sobald eber inacho isch, honds nuno mit ihna sina Spiiskarta gwedlet und spanisch ummaglaberet. Nochma Omelette und fritierta Kochbanana homer üs ufgmacht ad ADO Busstation. Döt hät da Matthias denn gsä dasser no a Mail öbercho hät vo Booking.com. Mür hond für da negst Stopp uf da Insla Holbox (Holbosch) 2 Reservieriga ka, wellmer zerst für 2 Nächt a Hüttli buacht hond uf ma Camping und üs denn entschieda hond zum an Tag früahner ana. Well aber für dia 1. Nacht ko Hüttli frei gse isch homer üs für a Zelt entschieda. Jetzt honds aber en Tag vorana a Stornierig gschickt mitem Vorschlag für a Zelt ufma andra Camping für di 1. Nacht und a Hüttli imna andera Hostel für di andera 2 Nächt. Beides isch a Stuck türer gsä, und d Bewertiga einiges schlechter als bim ursprünglicha. Denn homer i dena 10 Minuta wo no bliiba sind am Busbahnhof, di neua  Unterkünft buacht, well üs nünt anders übrig bliiba isch. Well d Insla über Wiahnacht eh scho mega usbuacht gsä isch. Noch dem huara Stress, simmer denn o scho im Bus ghogget uf Chiquilà. Döt homer denn gad di negst Fähra verwütscht und nochma halbstund Schiffli fahra homer z Holbox agleit. Mür hond glesa ka, dass dia Insla no mega entspannt isch nöd viel Touris hät und viel Charme söll ha. Isch üs denn bida Aakunft chli anderst vor cho. S hät gad no gwimmlet vo Golfwägeli (es git nard ko Autos uf da Insla sondern nu Velos, Golfwägeli oder Strandbuggies) alles isch irgendwia chli dreckig gsä und mega überloffa. Ufem Camping acho isch denn d Stimmig o recht am Arsch gsä, wells ofach kli abgfuckt usgsä hät und mür chli enttüscht gsä sind. Woni denn ha wela go Duscha, isch mer a Amerikanerin über da Wäg gloffa wo scho mit üs z Bacalar ufem Boottrip gsä isch. I ha ihra denn erklärt, dasmer nard ufma andra Canping gsä wärid, und denn hät sich usagstellt, dasses ihra genau glich 

Mexiko 3
ganga isch. Si hät üs denn o erklärt, dass am Vortag en mega Sturm gwüatet hät und da Camping underwasser gsä isch. Drumm sind alli Buachiga storniert wora. Etz hond o di z. T. chnütüüfa riesiga Günta Sinn gmacht, womer bim anilaufa uf da Strossa gsä hond. Hond üs denn entschieda zum d Insla chli erkunda und sind am Strand noh so wiit wia möglich geg Osta gloffa, döt hommet imna Resti Nachos gessa. Am Matthias honds nöd so gschmeckt wägem Bohnamuass wos druff ka hond und i ha ko fröd am Koriander ka. Zum Znacht homer denn amna Strossaständli Tacos gessa. Da "Resti" isch ofach so en klina fahrbara Waga, denn stellids nebetdra Plastiktischli und Stüahl ana und s git ofach nu Tacos und Tortas. Aber es isch so fein gsä, dasmer am nögsta Tag denn o no go d Tortas (e Art Sandwich) go essa sind. Nochma feina Drink für mi und ma Bier für da Matthias simmer zrugg tschumplet zu üsem Camping womer im Zelt erstunlich guat pfuuset hond. Am 23. Dezember homer üsers Züüg o scho wieder packt zum s Hostel wächsla. Am neua Hostel homer gschriba ka, dassmer am 11i achomid, sü hond o gantwortet segi guat aber isch denn ofach niamert uftaucht. Da eint vom Resti nebetdra hät üs denn gset sü chemid erst am 3. Mür hond denn mol no s WC und Duschi i Augaschii gno, und wärid am liabsta zrugg uf da Hippie-Camping. S WC isch recht grusig gsä und ida Duschi isch da ganz Boda volla Abfall gsä. Uu grüsig. Welmer ned am Platz hond wella warta simmer denn go Zmozmi essa und denn a Rundi am Strand wo recht überloffa gsä isch. Am 3 hommer denn s Zimmer bezoga und zum Glück honds denn o s WC und Duschi putzt ka. Nocher simmer nomol chli an Strand und a Stuck geg Westa gloffa. Döt hommer denn no mega viel schöni und grossi Muschla gfunda. Da Matthias hät da Priis für di gröst Muschla und i für di schönst gwunna :p. Ma, Pa, Si, Pa, Chr, Li chonder eu a dia Muschla erinnera womer dahom ka hond, oder all no hond, a sottigi eppa dopplet so gross hät da Matthias gfunda aber leider ischsi num soo schöö gsä. Mini isch viel kliner dafür no ganz ohni Löcher. Mol loga wiani dia uf Kuba und denn hom schmuggla. Denn homer no en mega schöna Sunnaundergang gsä und dabii a Bierli gnossa und danoch simer denn zu dem erwähnta Stand go Tortas essa. Nochana no für en Margharita (de hani sogär gärn ka, im Gegasatz zu dena am OASG) und a Bierli ina Resti und denn homer wella go pfuusa. Well da Hostel aber zmittzt im Chuacha ina isch, wa jo da Tag duur ganz cool isch isches ida Nacht erst am morga am 5i ruhig wora. Bis am 11i sind d Restaurantgäscht direkt vor üsem Zimmer ghogget, und d Wänd bestond nu us Holzstäcka mit amel eppa 2cm breita Spält da zwüschet. Und bis am Morga am 5i isch Vollgas luuti Musig gloffa irgendwo ida Nöchi. I ha jo nard en guata Schlof, aber do isches sogär mir z luut gsä. Zimlich gräderet simer drum am nögsta Tag verwachet. Nochma Zmozmi homer Velos gmietet und hond d Insla wella erkunda. Mer sind wieder a dä östlichst Punkt vom Strand womer hät chönna fahra und siehe da, well Ebbe gsä isch hätmer nomol paar Kilometer wiiter chönna laufa. Sind denn a Stuck gloffa, hond da Kitesurfer zuagloget wisses umtischet hät und denn homer üs uf da Wäg zrugg zu da Velos gmacht. Mit dena simmer denn richtig Westa gfahra, am Hostel verbi wo überschwemmt gsä isch und mengmol isch d Stross 30cm under Wasser gsä. Sind üs denn o mehreri Lüüt mit verreckta Golfwägeli vercho, wos hond müsa zrugg stoosa. Da Matthias isch amel vollgas mitem Velo dur dia Dreckgünta und i hami denn entschieda ebs z tüüf isch zum fahra und i durawat oder fahr. De Strand im Westa isch denn o eppa 50m breiter gsä als normal weg da Ebbe. Hond denn döt chli gsünnelet (bzw. I bi im spärlicha Schatta vo üserna Velos gläga) und chli gläsa. Nochana simmer mitem Velo am Strand no zrugg. Da Matthias voruus und i hinna noh. Irgendwo hani denn ebbis im Wasser ligga gsä und bi ana gfahra. A Frau wo chli hindermir gfahra isch, hät o gsä und isch o go loga cho. Ihren Maa isch o scho über alle Berge gsä und denn seit si womer bi dem Ding sind uf Schwizzertütsch "en Seestern" und i so "jo voll en Seestern". Nocher hätsi zerst mol müsa lacha welso glob nöd erwartet hät, dasi tütsch red. Uf jedafall hond denn dia 2 Manna (da Matthias ubd ihra sin) irgendwenn gmerkt, dasmer wohl ebbis gsä hond und sind zrugg cho. Da Seestern isch eppa 25cm gross gsä und uuu schöö, eb er no glebt hät wissemer nöd. Aber i ha s Gfühl scho. Noch paar Fotana simmer witergfahra. Denn homer üs Bierli gholt und uf da Sunnaundergang gwartet wo denn aber leider schlecht organisiert gsä isch und drumm nöd stattgefunda hät. Nochma Duschi (Warmwasser judihui) homer üs gerichtet für üsers Heilig-Obet-Essa. Da Matthias häts nomol gwoget und a Pizza bstellt (nochdem er ufma andera Tisch gsä hät, dass si guat us gsiaht) und für mi häts Knobli-Shrimps mit Riis geh. Isch fein gsä :) Nochana isch o scho wieder Ziit für s Bett gsä. Achtung etz wirds grusig: Davor hani no mini Bescherig ka, mit Darmproblem, bestes Wiahnachtsgschenk eväääär :p Dia Nacht isch no länger en Lärm gsä wia d Nacht davor und am 6i häts denn gruhiget. Nochma Crepe zum zmorga simmer mit da Fähra zrugg uf Chiquilà womer uf da Bus gwartet hond wo üs zrugg uf Cancun bringt. Döt hani denn 2.5h ghofft dass min Darm a Ruah giit, wellmer mit da 2. Klassbuslinia Mayab gfahra sind, wo ko WC a Board hond. Hät denn aber zum Glück ghebet. Zrugg z Cancun homer üsers Hostel gsuacht und denn nomol uf da Tourimarkt go luaga ebmer no a Souvenir findid. Nochma Bsuach im Walmart womer no 2-3 Sacha kooft hond, homer a Resti für da Znacht gsuacht. I ha was mexikanischs wella, da Matthias am liabsta ebbis Amerikanischs und am Schluss simmer bim Asiat ghogget, well nünt anders offa ka hät. Etz simer zrugg im Hostel, schribid no chli Charta und gond bald is Bett, dasmer morn fit sind für Kuba. Für Kuba simmer immerno nöd vorbereitet. S Einzig womer hond isch d Underkunft für di ersta 2 Nächta imna Casa Particular. Da sind Privati Lüüt wo Zimmer i ihrem Huus vermietid. Z Havanna wäremer bimna Frau wo mit ihra sinra Muatter zemmawohnt pfuusa und hoffid, dass si ps chli Tips cha geh, wos schö isch und wiamer döt ana chunnt. I globes s Reisa wird döt nöd so eifach sii wia z Mexiko. Da nögst Blog chunnt denn wohrschinlich erst ufem Homwäg, well d Wlan Abdeckig z Kuba wohl immerno nöd so da Hit isch. Drum eu allna en guata Rutsch!

Mexiko in Bildern

17Dez2018

Laguna Bacalar Ruinen von Tulum Bullie :) Antojitos Tulum Tubo Hostel Chäfer Laguna Bacalar Tulum Tubo Hostel Üseri Göppel Laguna Bacalar Ruinen von Tulum Laguna Bacalar Gran Cenote Cenote Carwash Gran Cenote Casa Cenote Meer vor Tulum Meer vor Tulum

Hola Mexico!

17Dez2018

Am Mittwochmorga am 4i simmer losgfahra an Flughafa Züri. Da Väli, am Matthias sin Mitbewohner, hät sich abota zum üs fahra. Döt simer go s Gepäck ufgeh, hond no eppis gessa und glich no viel vorigi Ziit ka. Wer mi kennt, weiss dasi immer z früah wett am Flughafa sii, gäll Tanja. Gfloga simmer über Düsseldorf uf Cancun. Am Obet am 6i (noch 20h Reis) simmer z Cancun acho, det hät scho da Taxifahrer uf üs gwartet, hond üs en Transfer gönnt. Womer im Hostel (El Hostalito) acho sind, homer üsers 2er Zimmer bezoga und sind no go Znacht essa. Sind ina klini Strossabeiz wo scho mol niamert Englisch gredet hät. Im Gegasatz zu Kambodscha und Ghana gits do no echt viel Lüüt wo nöd Englisch redid und da sogär ida Touristagebiet. Aber irgendwia klappets immer.  Am esta Tag z Cancun simmer zerst an Busbahnhof zum Bus-Tickets für da nögst Tag uf Tulum go chofa (5Chf für 2h Fahrt) und denn hommer da Mercado 23 und 28 abklapperet. Da 23 isch meh für di Iheimischa, mit Essa, Fleisch und Pinatas und ufem 28 gits vorallem Touri-Züüg und mer isch di ganz Ziit aquatscht wora, fast wia z Ghana. Nochana simmer no Richtig Hotel Zona gloffa womer kli an Strand ghögglet sind. Denn homer en Bus zrugg Richtig Hostel gno und am Obet simmer no Mexikanisch go essa. Am nögsta Morga simmer nochem Zmorga im Hostel di 1.5km an Busbahnhof gloffa und döt isch alles recht guat organisiert gsä und scho simer im (zu klimatisierta) Bus uf Tulum ghogget. Det simmer wieder eppa 1.5km zum Hotel (Zazil Kin) gloffa. Es hät luuter so klini Strandhütta. Strom gits nu vom Obet am 7i bisam Morga am 8i. Isch echt herzig aber für da Priis ziemlich basic. Nochdem mer icheckt hond simmer no zuda Ruina vo Tulum dia liggid direkt am Meer. Bim Iigang homer no 3 vo Oberriet und Rüthi troffa, d Welt isch doch chlii. D Ruina sind echt schö gsä o wens chli viel Lüüt ka hät. Mer hond o no riesigi Echsa gsä (ca. 70-80cm lang) und Mexican Racoons (so ebbis wia Waschbära). Danoch simer no an Strand gläga und spöter no am Strand nohgloffa und ina Resti go a Bierli trinka. Da 2. Tag z Tulum homer üs für 2 Tauchgäng agmulda ka. Well s Hotel verpeilt hät zum üsers Taxi uf di richtig Ziit z bstella homer gad no chli en Notlig übercho aber sind no rechzitig im Tauchgschäft gsä. Det homer d Usrüstig probiert und sind zuda Casa Cenote gfahra. Döt hät üs da Lehrer denn erklärt wa für Manöver dasmer nochana im 2m tüüfa Wasser üabt, bevor mer uf en eppa 40 minütiga Tauchgang goht. Nochana simer o scho in Neoprem ghüpft und denn is glasklar Wasser voda Cenota. Am Matthias isches gär nöd wohl gsä mit de ganza Usrüstig under Wasser, drumm ischer nochana a Rundi go schwimma wärend da Tauchlehrer, oni us Miami und i üsen ersta Tauchgang ida Cenota gmacht hond. Ussa ummi isch alles mit Mangrova verwachsa gsä und mer isch denn z. T. so chli under dena durataucht. Tiermässig hätmer etz ned gross was gsä, ussert amna bös luagenda grüana Moräna, Krebsli und Fischli. Aber isch glich a cools Erlebnis gsä, wells jo meh an See as s Meer isch. Nochan simer mitma Boot no ufs Meer usa wo denn nuno da Tauchlehrer und i en Tauchgang gmacht hond. Hät so lüüter Bruggana us Riff under Wasser ka womer hät chönna unna dura taucha, isch wieder mega cool gsä. Nochana homer no kli s Städtli erkundet, a halbs Poulet gessa, a Velo für di negsta 2 Täg gmiatet und denn simer zrugg is Hotel. S Velo isch wia mini Violetta vo Hawaii, en 1 Gänger mit Rücktrittbremsi. Da Unterschied isch, dass s Achti im Vorderrad no viel schlimmer isch wia da bida Violetta gsä isch und o sus isch da Allgemeinzuastand meh as dürftig. Am Matthias sis isch nöd besser. Am Sunntig homer us nochma feina Zmorga ufgmacht zuda Grand Cenote. Bi dera isch da Wasserstand eppa 10m under da Erda. Sprich es isch wia so a Loch im Boda. Es hät o no recht a grossi Höhli mit Stalagmitta und Stalaktita und Schildkrota sind o dinna umagschwumma. Dia hond o no en abtrenta Teil womer nöd ina tör damits ihri Ruah hond. S Wasser isch meh as Türkis gsä und mega klar. Isch echt cool gsä. Danoch simer mit üserna Göppel no wiitergfahra zuda Carwash Cenote. Det hegid früaner d Taxifahrer ihri Taxis gwäscha, drum da Nama. Dia isch ned so under em Boda gsä sondern meh an See. Sind denn döt o nomol chli go schwimma und chli go abitaucha. Danoch simer da ganz Wäg zrugg uf Tulum trettet womer no ebbis feins Zmittag/Znacht gessa hond bevor mer üs uf d Suach nochma Bankomat gmacht hond. Noch dem da erst üs nünt hät wella usaloh und di negsta 3 a Fehlermeldig a zeigt hond, bzw. en Blackscreen homer soger no ona gfunda wo üs Pesos usgspuckt hät. Danoch simer zrugg is Hotel, go tuscha und sii. Hond nochana mol nohgloget, sind eppa 30km mit üserna Schrottgöppel gfahra a dem Tag. Am Mentig simmer mit da Velos undem Gepäck is Städtli zuda Velovermietig gfahra, hond d Göppel zrugg geh und sind denn ad Busstation go warta. Dasmol isch da Bus nöd so pünktlich gsä wia z Cancun aber woner denn cho isch hät alles guat klappet. Dia Büss vo ADO sind echt ufma guata Stand und d Mitarbeiter lond sich voda Touris am Busbahnhof amel s Ticket zeiga, damit niamer sin Bus verpasst. Noch eppa 3h simmer z Bacalar acho. Da Städtli isch ussert im Kern ina recht abgfuckt und mür honds "La ciudad de los perros" tauft, well überall Hünd (und huara lüübi Babyhünd) ummalaufid. Da Grund wieso dasmer do en Halt machid, sind aber nöd di lüüba Hünd sondern d Laguna Bacalar (Laguna de los siete colores, Lagune der 7 Farben). Da isch en 40km langa See wo us 7 iigstürzta Cenota entstanda isch. Er hät mega viel verschiedeni blau, drum da Namma. Am Akunftstag homer no üseri Röhra im Tubo Hostel bezocha (jedes Zimmer isch a Betonröhra mit eppa 2m Durchmesser und knapp 2.5m lang, geg hinna a Betonwand und geg vorna a Glastüra). Je 5 Röhra liggid sich gegaüber und ida Mitti hets en Pool. Scho no cool gmacht. Für da dasmer do nöd mol meh d Hälfti zahlid vo dem wo da z Tulum kostet hät, bütets echt viel. Warmwasserduschana, Klimaalag und Zmorga isch o inklusiv. Nochem Bezug simmer no is Städtli ebbis go essa, a Rundi uf en Steg as Meer chli go sii und denn zrugg is Hostel.

Punta Cana

02Jan2018

Nard hani ned vor ka zum vo do was schriba, aber hami etz glich da gegaentschieda! Aso let's go...

Am Donnstig 28.12. sind d Liana und i losgfloga vo Züri uf Köln. Döt homer mol 4h töra warta well da Flüger uf Punta Cana 3h z spot abghoba isch. Acho z Punta Cana simmer mitem Bus vo Tui is Hotel gfahra wora. Scho no gmüatlich wemmer sich noch da Akunft um nünt kümmera moss. Im Hotel homer gad no kurz Znacht verwütscht und denn simer bald go pfuusa. Di nögsta Täg homer mit üserna Liablingsbeschäftigunga: schlofa, essa und am Strand ligga verbrocht. Viel z too gits do nöd usser mer wett sich da Sportprogramm (Yoga, Step und so Waar) atoo. Da Strand isch wia usem Ferikatalog. Hella Sand, türkisblaus Meer und meega viel Palmana. Z Essa gits Rund um d Uhr i 7 verschiedana Restaurants, under anderem en Asiat, en Mexikaner, en Spanier, en Italiener und a Steakhouse. Also mer ka sichs do richtig guat goh loh. Am Strand goht immer a Lüftli und drumm isches o nia brüatend heiss... Ida ersta 4 Täg hani fast 4 Büacher gläsa, gnüsses so richtig zum mol ofach da Ziit z ha. So en Büacherkonsum hani glob scho siit da 5 wüchiga Summerferii ida Sek numma ka...
Am Obet findet meistens no so a Tanzshow statt. Dia Tänzer(inna) honds huara im Griff, do chond alli andra Hotelshows woni scho gsä ha, gad iipacka. Danoch gönnemer üs amel no 2-3 Piña Colada und versuachid üs d Animateura vom Hals z halta und denn keiid mer o scho wieder vom viela Nünttoo butz müad is Bett.
Hüt homer a organisierti Tour gmacht. Anderst kunnt mer eigentlich nöd zum Hotel usa, mer sind do voll abglega und mini Idee zum mol no a Auto mieta hät mer d Jacqueline üsi Reiseleiterin ustriba mitem Argument, dass Tui überall o eigni Autovermietiga hät, usser do, es segi ofach z riskant und bimna Schadensfall segi immer s "Bleichgsicht" Schuld und d Vollkasko halti o nöd wasi verspricht. Jenu homer halt a übertüüreti organisierti Tour gmacht. Zersch simmer mitem Car an Fuass vomna Hügel gfahra. Det i so e Art Safaribus umgstiga und mit dem ufda Hügel ui gschauklet/ghüpft. Mer hät fast mösa loga dass om nöd usagspickt hät... Doba acho homer d Ussicht gnossa und Föteli gmacht. Es isch alles uuu grüa und i ha i mim Leba no nia so viel Palma gsä wia do. Würklich ÜBERALL häts Palmana. Nochdem mer heil wieder abacho sind, simer mitem Car zumna Hafa gfahra womer ina Speedboat umgstiga sind. Mit dem simmer denn Richtig "Bacardi Island" gfräset. Underwägs hät zmol ebber gruafa: "Wal, Wal!!!" Und prompt, nöd wiit wäg isch en Wal ufgumpet. Da Fahrer hät denn en Sprint no nöcher ani heriglet und denn homer gwartet. Zmol isch ona eppa 20 Meter nebet üsem Böötli uftaucht. Mega iidrücklich! Insgesamt sind 3 gsä wo mol d Schwanzflossa und paarmol da Rucka zeigt hond, und womer scho ufda Wiiterfahrt gsä sind, hät 1 no en richtiga Jump anaglait.
Uf "Bacardi Island" homer a Piña Colada trunka, Zmittag gessa und sind no chli go Schnorchla. Leider homer nöd di erwarteta Seesterna gsä :(. Üse Fotograf hät gmont: "You have to make luki luki." I ha denn gsait: "I made luki luki, but no fishi fishi." Jenu, mer cha nöd alles ha. Noch da Insla simer mitem Speedboat witer zumna Insla mit Duzenda Pelikan. Glatti Tier... Denn hät da Fahrer no chli zeigt, wa da Böötli cha, ha scho chli Angst übercho. Nocher isches zum Glück chli gmüatlicher wora, well mer dur en Mangrovawald gschaucklet sind. Nochana homer no a Höhli besichtigt, wos Höhlamolereia hät, angeblich voda Uriiwohner, d Liana hät gmont: "Chönntid o vo mir sii". Nochma Rum Cola simer zrugg zum Hafa womer wieder in Bus gstiga sind. Underwägs zrugg is Hotel homer denn no mol en Stop gmacht womer hät chönna frischi Cacaobohna probiera. Has z Ghana scho mol probiert und nuno gwisst dass mega glibberig sind. Sind aber nöd nu glibberig sondern o zuckersüass. Wos scho fast dunkel gsä isch, simer zrugg is Hotel cho. Isch echt en iidrücklicha Tag gsä, womer bestätigt hät, dasi meh s Reisefüdla als s All-inclusive-Chind bi.

Silvesterbüffet Silvesterbüffet Silvesterbüffet Silvesterbüffet Silvesterbüffet Silvesterbüffet Silvesterbüffet Bacardi Island Bacardi Island Bacardi Island Bacardi Island D Wal ida Bucht vo Samana D Wal ida Bucht vo Samana Uf dem Hügel Feriibuddies :) Pelikan D Insla mit da Pelikan Mangrovawald

Apropos all-inclusive Chind, zersch mol en herzlicha Dank a mini Mama (und min Papa) dass sü üs (a Mindestmass) a Astand und Maniera biibrocht hond. Hät do nemlich einigi Lüüt mit nünt vo beidem. Sacha womer do ka beobachta:

- Lüüt wo sich d Teller meh as voll biigend, zum am Schluss vo allem bitz z probiera und meh as d Hälfti sto z loh
- Lüüt wo sich gegaüber hoggid im Restaurant und nu ufs Handy starrid
- A Famili mit 2 Chind wo eppa 4/5i sind unds d Eltra im Resti im Chinderwaga hogga lond (so en Waga wos 20cm überem Boda hoggid und nöd ufda Tisch ui gsänd), zur Krönig wird beidna a Handy id Hand druck und sü wärid nu mit Pizza gfüatteret (bim Asiat), Mama kamer mit 4i nöd scho selber essa?
- Nomol a Famili mit 2 Meitla ca. 8i und 12i wo beidi mitem Tablet ufem Tisch döta hoggid unds d Eltra anstatt aschnorid sü söllids vom Tisch neh, ihna no hälfid zums Salzbüxli richtig under s Tablet legga, damit d Chind d' Egoshooterfilmli (sind dia nöd no chli jung für da?) o im richtiga Winkel loga chond
- ca. 11 jöhrigi Meitla wo mit enniga Hacka umastolzierid (what the fuck i dem Alter bini no im Summer wenn immer möglich barfuass ummagloffa (aso usser imna Resti natürlich))
- Allgemein Chind mit gsunda Bei wo no im Waga ummagstossa wärid, obwohls dia 1000 Meter womer do am Tag lauft, locker selber laufa chönntid
- und natürlich alli Goofa wo im Schweesawaga a Handy oder Tablet ufem Schoss hond

Wett mer nöd vorstella, wa dia Mitarbeiter do denkid wenns da Überaagebot a essa gsend (und wa wäggworfa wird) und sü mond 3 Wucha am Stuck schaffa, damits denn wieder 6 Täg zu ihna sina Familana chond und verdienid i om Monet o so nu en Bruchteil vo dem wo mür do für 2 Wucha Feri usgend...

Also alli wo wend Chind mit Maniera erzücha, buachid eu a Wucha all-inclusiv luagid wias dia Eltera döt machid und machids anderst...

Time to say goodbye!

22Nov2017

Noch üsem Bsuach uf da Killing Fields und im S-21 homer us wieder is chaotisch Marktleba gstürzt und ufem Russian Market no paar Souveniers kooft. Noch üsem letsta Znacht homer üs no en Cocktail gönnt. Am Sunntig isch üsen Flug erst uf di 9i am Obet agseit gsä und drumm homer denkt isches ideal zum no da Royal Palace go aloga. Leider häts denn di ganz Ziit mega fest gschüttet, drum simer i Riah go zmörgala und sind no a Wiili hogga bliba ida Hoffnig dasses ufhört. Häts ned nöd drum homer üs entschieda zum nomol uf de Russian Market. De isch überdeckt, und wells so grägnet hät, isches mega agnehm gsä bi 24 Grad chli ummazschlendera. Am Vortag isches extrem heiss gsä und denn bini amel ofach erledigt. Nochdem mer denn fast da ganz Markt abklapperet ka hond (Huushaltabteilig, Souveniers, Fisch und Fleisch, Garchuchana, Souveniers, Stöff, Auto- und Töffteili, Frücht,...) unds immerno grägnet hät, simer mitma Tuktuk zrugg is Hostel go Schirm hola. Denn simmer z Fuass i de Royel palace. Isch mega schö gmacht und mega prunkvoll. Aber bi schö Wätter wärs halt scho no schönner gsä, und wenn mer ned vo 100ta Chinesa umgeh gsä wär. Nochmana Duschi und am Andi tschau säga homer üs uf da Wäg an Fkughafa gmacht. Isch a halbi Ewigkeit ganga, wells überall gstaut hät. Aber sind glich no vorig früah (sorry Tanja :p) am Flughafa gsä. Hond icheckt, eppis gessa und denn boarded. Nochma Stund flug mit fast 1.5m Beinfreiheit simer z Bangkok umgstiga und denn nomol 12h uf Züri gfloga. Denn simer o scho wieder im Zug ghogget Richtig Rhintel/St. Galla und a bitz wehmüatig wora. D Ziit isch viel z schnell verganga unds isch mega schö gsä! Aso mer chond Kambodscha nu empfehla, o für dertig wo s erst Mol go backpacka gond. Isch mega unkompliziert zum Reisa, hät schöni Natur und a interessanti (/erschreckendi) Gschicht...

Next destination: ?

To travel is to live! ❤???

Phnom Phen

19Nov2017

Am Fritig nochem Zmorga simer nomol a Rundi go bada und denn homer chönna mitem Boot uf di ander Siita voda Insla fahra. So homer üs da halbstündig Fuassmarsch ersparrt, dafür a 1.5h Bootsfahrt uf üs gno. Am Saracen Beach simer no s letscht mol is Wasser gumpet, hond Zmittag gessa und denn isch o scho s gross Boot cho wo us zruck uf Sihanoukville brocht hät. Ufem Rückwäg sind nu da Käpten, da Schiffsjunge, da Instructor Marco, d Kerly und mür 3 (Tanja, Andy & i) gsä. Nochdem mer vo Board sind, hät üs da Marco a Tuktuk organisiert und damit simer zum Dive Shop. Zum Glück häts gad no a vorigs Zimmer (sogär mit AC und Warmwasserduschi) ka womer hond chönna bezücha. Nochem Znacht simer bald is Bett well am nögsta Tag am 7i da Wecker gschället hät. Denn simer kurz go essa, hond üs voda Kerly verabschiedet und sind mitma Büssli uf Phnom Penh gfahra. Döt homer a Hostel bezoga und sind no chli dur d Stadt gschlenderet. Da Samstig isch underem Motto "Kambodschas Vergangenheit" gstanda.
Mür hond d Killing Fields und s Tuol Sleng Gfängnis (S-21) bsuacht. Für dia wo ko Ahnig voda Kambodschanischa Gschicht hond (so wia mür bis hüt) do a kurzi Zemmafassig. Nu für Lüüt wo krassi Sacha lesa chond. Sus besser überspringa.
Vor 1975 hät da Pol Pot, en Kambodschaner wo z Paris studiert hät, d Idee vomna Kommunistischa Kambodscha ka. Er hät gfunda dass d Städter und di bildeta Lüüt besser gstellt sind as d Buura und hät wella, dass alli Lüüt ida Landwirtschaft tätig sind und alles allna ghört unds ko Geld meh git. Denn häter sich mit Jugendlicha vom Land zemma to und di rota Khmer gründet. Innerhalb vo nu 3 Täg hond Phnom Penh "evakuiert" und alli Lüüt ufs Land vertriiba. Well di bildeta Lüüt nöd i de kommunistisch Gedanka passt hond (obwohl da Pol Pot selber ona vo dena gsä isch, gnau so wia da Hitler selber nöd arisch gsä isch), sind alli wo a Fremdsproch hond chönna, a Brilla treit hond, en Bruaf wia Lehrer oder Ingenieur usgüabt hond, oder aber o scho nu ida Stadt gläbt hond, Feinda gsä. Di ganz Bevölkerig hät mösa Zwangsarbeit ufem Feld leista. Di bildeta Lüüt sind systematisch ermordet wora. Zersch sind vieli is S-21 (a ehemoligi Schual) cho. Döt sinds so lang gfolteret wora, bis gstanda hond, ebbis gega Regime gmacht z haa. Z.B. für d Amis spioniert z ha. Sobalds so ebbis gstanda hond, sinds zuda Killing Fields brocht wora. Döt sinds mit Äxt erschlaga und i Massagräber verbuddlet wora. Damit di Verwandta/Chind ko Rache hond chöna usüaba, sind so ganzi Familena ermordet wora. Da Lüüt isch bida Akunft uf da Killing Fields ageh wora sü chemid i neui Hüüser. Damits nöd checkt hond, wa döt vor sich goht, sinds i Hüttana ohni Fenster gsperrt wora und s ganz Gländ isch mit Musig beschallt wora, damits d Schrei voda Sterbenda nöd ghört hond.
I da Ziit vom Pol Pot sind 3 Mio. vo da 8 Mio. Iiwohner Kambodschas umbrocht wora.
Irgendwenn hond di rota Khmer agfanga sich gegasiitig z ermorda, well niamer niamertem meh traut hät, und jeda en potenziella Feind gsä isch. Eppa 1979 sind denn d Viatnamesa mit Desserteura voda rota Khmer iimarschiert und hond di rota Khmer vertriba. Erst do isch langsam uscho, wa uf dena Killing Fields und allgemein im Land passiert isch.

D Mehrheit voda Massagräber uf da Killing Fields sind göffnet wora und d Chnocha sortiert und gsüberet wora. S grösst Grab hät eppa 450 Liichana dinna ka. Bi vielna Gräber häts hüt Mahnmal. Mer findet hüt no Chnöcha und Kleider vo Opfer wo bim Rega füra chomid wens d Erda wägwäscht. Isch mega iidrücklich. A om Ort häts ida Wurzla voda Bömm no echt viel Kleidigsstuck ka wo damit verwachsa sind und wemmer gnau gluagat hät, hätmer o no Chnöcha entdeckt. Isch mega erschreckend und o ziemli verstörend. All 2-3 Mönet dond d Wächter voda Killing Fields so Kleider und Chnöcha iisammla. Mer hond fast 2h döt verbrocht und s isch echt extrem krass. Danoch simer no is Gfängnis S-21 und hond o no en Rundgang mitma Audioguide gmacht. Döt stond no d Better wo d Häftling gfolteret wora sind und o sus isch vieles im Originalzuastand und s isch recht verstörend. Vorem Usgang isch no en Maa ghogget wo da Gfängnis überlebt hät. Es sind glob nu 7 Lüüt lebendig usacho. Mer hond kum gmerkt wia schnell d Ziit verganga isch. Sind erst kurz vorem 3 mit dena 2 Rundgäng fertig gsä und ebbertem ohni starchi Närva, würi de Bsuach vo dena Ort definitiv nöd empfehla. Wani no krass gfunda ha, a om Ort im Gfängnis häts a Tafla ka, womer hät chönna züüg heraschriba. Ebbert hät gschriba: "Never again" und en andra denn an Pfiil zu "Myanmar?" Di meista hond wohrschindlich nochem 2. Weltkrieg scho denkt "never again" und glich isches sit do leider no zu meh sotiga Verbrecha cho...

Uf da Fahrt zrugg uf Sihanoukville Wo da Mekong und da Tonle Sap zemmaflüssis Dessert Sunnaundergang am Mekong / Tonle Sap

Auf dieser Seite werden lediglich die 10 neuesten Blogeinträge angezeigt. Ältere Einträge können über das Archiv auf der rechten Seite dieses Blogs aufgerufen werden.